Егер ғайыптан тайып жолыңыз түсіп, осы күндері Алматы облысы Еңбекшіқазақ ауданы Ақши ауылына бара қалсаңыз, өткен ғасырдан бүгінгі заманға топ етіп түсе қалғандай ескі ауылды көресіз. Өйткені Ақши ауылының маңында белгілі режиссер Талғат Теменовтің «Қара қыз» атты әскери драмасының кезекті сюжеттері түсірілді.
Осылайша кескіндемеші-суретшілер сол кездің бүкіл ахуалы мен бейнесін толық беру үшін жазық далада ІІ дүниежүзілік соғысы қарсаңындағы тұтас бір ауылды салды. Мұнда өткен күндердің куәсіндей ескі тоқал тамдарды, теміржол вокзалын, клуб, мектеп, пошта, диірменді табуға болады.
«Тылдағы елдің тыныс-тіршілігін бейнелейтін ауылды тұрғызуға бір жарым айдай уақыт кетті. Бұл өте қиын болды. Айдалада, айналада ештеңе жоқ, он шақты адам жұмыс істедік. Ауыл өткен ғасырдың 30-40 жылдарындағы архивтік құжаттар негізінде жасалды. Бас-аяғы он бес ғимарат салдық», дейді картинаның қоюшы-суретшісі Еркен Сүлейменов.
Қоюшы-суретші Еркен аталған фильмнің Солтүстік Қазақстан облысындағы түсірілім жұмыстарына да қатысқан. Ол жерде Сүлейменовтің командасы жертасалар, жаттығу орталығы, жау комендатурасы мен аурухананы салған. Қоюшы-суретші өзінің осы жұмысын болашақ фильмдерге арналған декорация ретінде қалдырғысы келеді.
«Менің бұл салада жүргеніме он шақты жыл болды. Кино түсірілімдерінен кейін әдетте декорацияны бұзып тастағанда ішің күйеді. Бұл менің әкемнің кіндік қаны тамған жер. Сондықтан «Қара қыз» картинасына бола іргесі қаланған ауылды келешекте басқа кинорежиссерлерге көмектесу үшін қалдырғым келеді. Әсіресе жас студенттер мен олардың дипломдық жұмыстары үшін де бұл «ауыл» жақсы болар еді», дейді Еркен Сүлейменов.
Сонымен «Қара қыз» – ІІ дүниежүзілік соғысы кезіндегі адамдардың тағдырын баяндайтын әскери драма. Фильмде соғыстың барлық тақсіретіне қарамастан, бірін-бірі табатын кейіпкерлердің оқиғалары баяндалады.
Басты рөлдерде жас актерлар Нұрай Сақтапова мен Ерлан Құлмұрзин ойнады. Нұрай үшін бұл кинодағы тырнақалды рөлі, ал Ерлан телехикаялардан жиі көрініп жүр.
«Менің кейіпкерім Асқарбек есімді қарапайым ауыл жігіті, соғыс жылдарында ол майданға аттанып, батылдықпен шайқасады. Фильмде ауыр көріністер көп, көрермендердің қызығушылығын сақтап қалу үшін барлық құпияларды ашпай-ақ қояйын», – дейді Ерлан Құлмұрзин.
Сондай-ақ фильмге көпшілікке танымал Дулыға Ақмолда, Медғат Өмірәлиев сынды өнер майталмандары да түскен. Картинаның негізгі түсірілімі 23 қыркүйек пен 14 қазан аралығында Солтүстік Қазақстан облысының аумағында, Қызылжар қаласының маңында өтті. Ал Ақши ауылындағы түсірілім 2 қарашада аяқталды.
Мәдениет және спорт министрлігінің тапсырысымен, Ұлттық киноны қолдау мемлекеттік орталығының көмегімен түсірілген картинаның тұсаукесері келесі жылдың көктеміне жоспарланған.
АЛМАТЫ