Жаңа күн

Жаңа Қазақстанның алғаш­қы күні дегенде меңзеп отыр­ғаны – кешегі өткен Президент сайлауының қорытындысы екені кім-кімге де белгілі. Орта­лық сайлау комиссиясының алдын ала есебі бойынша Қасым-Жомарт Тоқаевқа сай­лау­шылардың 81,31 пайызы дауыс берген. Ел бола­шағы аламан таңдауға түскен сай­лаудағы Қасым-Жомарт Тоқаев­тың осы­нау сенімді жеңісі жаңа Қазақ­станмен байла­ныстырылуы заңды әрі табиғи. Өйткені «мың өліп, мың тірілген» халқымыз жаңа, әді­летті Қазақстанды қалап отыр. Сол себепті де сай­лау­шылардың көп­шілігі алдағы жеті жылда Қасым-Жомарт Тоқаевтың Мемлекет басшысы бол­ғанын қалайды. Бүгін сол халық қалауының нәтижесін көріп отырмыз.

Сайлау алдында кесір, керауыз сөздер де айтылды. Бүлікке шақырған әумесерлер де табылды. Мұндайларды халыққа жаны ашиды, елдік мүддені ойлайды деп әсте айта алмас едік. Халық та мұны түсінбейтін ақымақ емес. Өзіне кімнің дос, кімнің қас екенін айырады. Болашағының кіммен бірге екенін халық тамыршыдай тап басып, дәл анықтап болжайды. Халық сенімі алдамайды. Сол себепті де ел азғырғандарға ермей, сай­лауға үлкен белсенділікпен қа­тысты. Аламанға түскен үміт­керлер арасында іс басындағы Пре­­зиденттің оқ бойы озық­тығы көрініп тұрды. Мұны сай­лау­шылар да растап берді.

Қ.Тоқаев жаңа, әділетті Қа­зақ­станды елмен бірге қалай құру­дың жоспар, бағдарламасын тиянақтап баяндап берді. Халық соған сенгендіктен де зор үміт артып отыр. Осы арада ұлы Абай­дың мына бір шумақ өлеңі ойға оралады:

«Сені жақсы көрмесе,

Сенер ме еді сөзіңе?

Апыр-ай деп терлесе,

Ар емес пе өзіңе?!»

Хакім айтса айтқандай, халық жақсы көрмесе, ел басшы­лығындағы ерен еңбегін елемесе, сайлауда сенім білдірмес еді, ел Президенті етіп таңдамас еді. Сенім білдірді демек, халық жақ­сы көреді. Әрине, енді осы сенімді ақтау керек. Абай айтқан­дай, өзіне сенім білдірген туған халқын апыр-ай дегізіп терлет­кізбей, азаматтық арын жоғары ұстайтынына сенім мол.

Қорғанбек АМАНЖОЛ,

ақын, ардагер журналист,

Халықаралық «Алаш» әдеби сыйлығының лауреаты