Туу туралы куәлік алу әуре-сарсаңға түсіреді деп кім ойлаған? Жүре берсең көре беретінің рас екен. Тараздық тұрғындар біршама уақыттан бері тілдей қағазға қол жеткізе алмай алашапқын болып жүр. Қала әкімдігі құжат сұрағандарға «бланкі жоқ» деген уәж айтып, оларды кері қайтарып жатыр.
Шаһар тұрғындарының айтуынша, туу туралы куәлікті алу кейінгі екі айдың бедерінде айтарлықтай мәселеге айналып кеткен. Балаларының заңды құжатын қолына түсіре алмай шамданған жұрт мәселенің жуық арада оңынан шешілгенін қалайды.
«Ілгеріде бұл құжат бар болғаны үш күнде берілетін. Айталық, бірінші балама 72 сағаттың ішінде алған болатынмын. Ал қазір жағдай қиындап кеткенін көріп отырмыз. Жағдайдың осылай ушығуы шынында да ұят қой. Осындай олқылықтың салдарынан жұрт жәрдемақыны ала алмай даурығып жүр», деді өткір мәселеге қатысты үн қатқан Тараз қаласының тұрғыны Дәурен Жанұзақов.
Ызаға булыққан көпшіліктің ішінде АХАТ бөлімінің табалдырығын тоздырып жүргендер де аз емес. Солардың бірі – Арын Бейбарыс. Оның айтуынша, ұлының тиісті құжаты болмағандықтан емханаға тіркеудің өзі мұңға айналған. Алыстан қатынайтын азамат облыс орталығында осындай мәселенің туындағанына наразы.
«Мамандар «сіздікі қаңтар айында дайын болады» деген жауапты алға тартып отыр. Меніңше, бұл дұрыс емес. Біз айдаладағы ақ отау саналатын алыстағы ауылда тұрып жатқан жоқпыз. Облыс орталығын мекен етіп отырмыз. Өзімізді «Жаңа Қазақстанда» тұрып жатырмыз деп жүрміз ғой. Ендеше мамандар да сол «Жаңа Қазақстан» азаматы ретінде еңбек етуі керек. Бұлар қашан соған лайықты жұмыс істейді? Осы бір тілім қағаз үшін күн құрғатпай сандалып жүруім керек пе?», дейді ашуға булыққан Арын Бейбарыс.
Шаһардағы АХАТ бөлімінің басшылары туындаған мәселенің өткір екенін жоққа шығарып отырған жоқ. Олар туу туралы куәлік тапшылығын цифрландыру жүйесіне көшумен байланыстырып отыр. Алайда цифрландыру жүйесінің қағаз жүзіндегі құжатқа қаншалықты қатысы бар екенін түсіндіре алар емес. Айтуларынша, Әділет министрлігі бланкі атаулының санаулы ғана данасын жіберген.
«Бұл мәселе өткен көктем мезгілінен бері туындаған болатын. Анығырақ айтар болсақ, наурыз айында басталды. Бұл енді цифрландыру жүйесіне көшумен байланысты болып отыр. Бүгінгі таңда тамыз, қыркүйек, қазан айында дүниеге келген балаларға беріп жатырмыз», дейді Тараз қаласы әкімдігі АХАТ бөлімінің басшысы Бақытнұр Тілеубекқызы мәселенің мәнісіне үңіліп.
Облыстық әділет департаментінің жауабына зер салсақ, куәлік беруде кінәрат жоқ секілді. 2022 жылдың басында тиісті департаменттен 38 мың дана туу туралы куәлік алынып, жергілікті атқарушы органдардың АХАТ бөлімдеріне жолданған. Аталған кәуліктер тараптардың сұраныстарына сай берілген көрінеді.
Бұл мәселеге қатысты тұрғындардың уәжі кімді де болса ойландырмай қоймайды. Халқының саны 400 мыңға жетеқабыл Тараз қаласында 2021 жылы 11 753 балаға тиісті құжаты уақтылы берілсе, 2022 жылы туу туралы куәлік алған періштелердің саны 10 мыңға жуықтаған. Осы көрсеткіштің өзі көп жағдайдан хабар беріп тұрса керек. Ал ушыққан мәселе үшін жауапкершілікті мойнына кім алмақ?
Қысқасы, Тараздағы туу туралы куәлік мәселесі жұртшылықты қатты толғандырып отырғаны талас тудырмайды. Әлбетте, жыл өткен сайын демографиялық ахуалдың көрсеткіші артып келеді. Жергілікті жұртшылық бұл мәселеде АХАТ бөлімінің мамандарымен немесе тиісті департамент әлде министрлікпен ақылдаспайтыны да белгілі. Сондықтан жергілікті жердегі мамандар құжатты артығымен алып қойса, оларды ешкім қолынан қақпайтын шығар... Қалай алып қарасақ та, 72 сағатта берілетін құжаттың соңында екі айлап жүгірген халықтың уәжі орынды. Өйткені олар тілдей құжаттың соңында табан тоздырып жүр.
ТАРАЗ