Мемлекет басшысына өңірдің былтырғы әлеуметтік-экономикалық дамуы жөнінде есеп беріліп, осы жылға арналған жоспары таныстырылды, деп хабарлайды Egemen.kz.
Ералы Тоғжановтың айтуынша, Ақтөбе облысында тұрақты макроэкономикалық жағдай қалыптасқан. Өнеркәсіп, ауыл шаруашылығы, инвестиция және тұрғын үй құрылысы салаларындағы негізгі әлеуметтік-экономикалық көрсеткіштердің өсімі қамтамасыз етілген.
Президентке инвестиция тарту жөніндегі шаралар туралы баяндалды. Өткізілген инвестициялық форумдардың нәтижесінде тек соңғы үш айда жалпы құны 3 триллион теңгеден асатын 12 меморандумға қол қойылды. Сондай-ақ өңірдің экологиялық ахуалын жақсарту жұмыстары жандана түсті.
Бұдан бөлек, агроөнеркәсіп кешені мен ауылдық жерлерді дамытуға қатысты Президент тапсырмасының орындалуы жөнінде мәлімет берілді. Облыс әкімі өңірдегі 315 елді мекенді кешенді түрде дамыту тұжырымдамасы әзірленіп жатқанын жеткізді.
Айта кетсек, аймақта «Ауыл аманаты» жобасы жүзеге асырылып жатыр. Жобаны қаржыландыруға 2022 жылы республикалық бюджеттен 3 миллиард теңге, биыл қосымша 3,5 миллиард теңге бөлінген.
Сонымен қатар «Білім All» жобасы аясында 10 мыңға жуық бала оқитын 120 шағын жинақты ауыл мектебінің білім сапасын арттыру шаралары қабылданып жатыр.
Кездесу соңында Президент өңір инфрақұрылымын дамыту және облыс тұрғындарын алаңдататын әлеуметтік мәселелерді шешу жұмыстарын жалғастыруды тапсырды.