Еңбек және халықты әлеуметтік қорғау министрлігі «Атамекен» Ұлттық кәсіпкерлер палатасымен бірлесіп, кадрларға қажеттілікті анықтау мақсатында жұмыс берушілерді «Электрондық еңбек биржасы» мемлекеттік ақпараттық порталында онлайн-сауалдамадан өтуге шақырады.
Деректерді жинау 2023 жылдың қаңтар-ақпан айларында жүргізіледі. Сауалдама барысында республиканың барлық өңірлерінен экономиканың түрлі салаларында қызмет ететін 45 мыңға жуық жұмыс берушіні қамту жоспарлануда.
Сауалдама мынадай блоктардан тұрады: кадрларға қажеттілікті талдау; жұмыскерлердің босатылуын бағалау; шетелдік жұмыс күшін тарту және Қазақстанда дуальды оқыту. Бұл экономикалық қызмет түрлері мен кәсіптер бойынша толыққанды жоғары деңгейде еңбек нарығының нақты қажеттілігін анықтауға мүмкіндік береді.
Зерттеу нәтижелері бойынша кадрларды даярлауға мемлекеттік білім беру тапсырысын қалыптастыру үшін ұсынымдар мен ұсыныстары бар талдамалық есеп дайындалады.
«Егемен-ақпарат»