«Digital Almaty: жаңа болмыстағы цифрлық әріптестік» халықаралық технологиялық форумы аясында цифрландыру саласындағы үздік жетістіктері үшін дәстүрлі жыл сайынғы сыйлық табыс етіледі. Бұл туралы Цифрлық даму, инновациялар және аэроғарыш өнеркәсібі министрлігі хабарлады.
Жеңімпаздар алты аталым бойынша белгіленеді. Атап айтқанда, EdTech Company of the Year; MedTech Company of the Year; FinTech Company of the Year; e-Commerce Company of the Year; Woman in Tech of the Year; Venture Capitalist of the Year аталымдары бойынша бақ сынауға болады.
IT-саласындағы барлық компания Digital Almaty Awards бөлімінде «Өтінім беру» батырмасын басып, форумның almatydigital.kz сайтында сыйлық алуға өтінімді бере алады. Өтінімдер 21 қаңтарға дейін қабылданады. Жеңімпаздар 2023 жылдың 2-3 ақпанында «Digital Almaty: жаңа болмыстағы цифрлық әріптестік» форум барысында марапатталады.
Айта кетелік, алғашқы рет аталған сыйлық «Digital Almaty: жаһандық экономиканың цифрлық болашағы» форумында 2020 жылы берілген, онда 10 цифрлық жоба ұсынылған, оның ішіндегі 8-і «IT-чемпионы» санатындағы Қазақстанның үздік IT-компаниялары өнімдері және 2 жоба Astana Hub брендтегі стартаптар.
Digital Almaty – цифрлық күн тәртібін, цифрлық трансформацияның жаңа стратегияларын және цифрлық технологиялар саласындағы трендтерді талқылауға арналған дәстүрлі диалог алаңы. Форум 2018 жылдан бастап бес рет өткізілді. Іс-шараны еліміздің Цифрлық даму, инновациялар және аэроғарыш өнеркәсібі министрлігі, Сыртқы істер министрлігі, Алматы қаласының әкімдігі, Tech Garden және Astana Hub ұйымдастырады.
«Егемен-ақпарат»