«Арыстанмын, айбатыма кім шыдар?» деген өлеңінде Мағжан өлім туралы «Мен өлмеймін, менікі де өлмейді...» деп айтқан ғой. «Мен» мен «менікі» туралы ұлы Абай «Көк тұман – алдындағы келер заман» өлеңінде:
«Ақыл мен жан мен өзім, тән менікі,
«Мені» мен «менікінің» мағынасы екі.
«Мен» өлмекке тағдыр жоқ әуел бастан,
«Менікі» өлсе өлсін, оған бекі»,
десе Мағжан «менікінің» де өлмейтінін айтқан екен. Шынында Абай, Мағжан сияқты ақындардың туған халқы барда «менікісі» өлер ме? Ғажап сөздері, ғасырларға жететін даналығы ұмытылар ма? Керісінше олар жаңа оймен, жаңа сезіммен, жаңа таныммен жаңғырып, жетіле бермей ме? Осы сөздің растығын кеше Мағжанның 130 жылдығына арналған Қызылжардағы республикалық жазба ақындар мүшәйрасы дәлелдеп берді. «Мен өлмеймін, менікі де өлмейді» атты бұл мүшәйраға еліміздің түкпір-түкпірінен 20 мен 50 жас аралығындағы 90 адам қатысты. Олардың ішінен 9-ы іріктеліп, Мағжан Жұмабаев атындағы тұңғыш әдеби сыйлықтың лауреаттары атанып, 300 мың теңгеден сыйлық алды. Мағжан үнін бүгінге жалғастырушылар қатарында Астана қаласынан Танакөз Толқынқызы, Бауыржан Қарағызұлы, Алматы қаласынан Бағдат Мүбәрак, Абай облысынан Мерей Қарт, Ақмола облысынан Қуаныш Оспанов, Қостанай облысынан Абылай Мауданов, Шымкенттен Арайлым Мұратәлиева, Қызылжар өңірінен Аманжол Зағыпар мен Нұргүл Оқашева жеңімпаз деп танылды. 90 адамның арасынан 9 ақынды таңдап алу Қазақстан Жазушылар одағының Ұлықбек Есдәулет, осы ұйымның Арқадағы алты облысының кураторы Дәулеткерей Кәпұлы және әділқазылар алқасының үшінші мүшесі болған осы жолдардың авторына оңай болған жоқ.
«От болып туған жасын едің ғой!
Өмірге шексіз ғашық едің ғой!
Адамзат түгіл замманнан озған
Өшпейтін алтын ғасыр едің ғой.
Ар менен ұят – қазығың болды!
Махаббат – жалғыз азығың болды.
Қазақты сүйдің, айыбың – осы!
Сол сенің жалғыз жазығың болды!»
(Танакөз Толқынқызы)
деген сияқты соны пікірлі жолдарды әрбір ақынның өлеңдерінен табуға болатын.
Іс-шара аясында жүлделі болған ақындармен М.Қозыбаев атындағы СҚУ-да, М.Жұмабаев атындағы гуманитарлық колледжде, Абай атындағы мамандандырылған қазақ мектеп-гимназиясында және Назарбаев зияткерлік мектебінде шығармашылық кездесулер ұйымдастырылды.
Петропавл