Денсаулықтан қымбат байлық болмас, сірә. Тән саулығының қадірін басы ауырып, балтыры сыздаған жан біледі. Әсіресе оң-солын әлі тани қоймаған балалар ауырмасын деңіз.
Атырау облыстық балалар ауруханасы баспасөз қызметінің ақпаратына қарағанда, омыртқадағы жұлынның бұлшық ет атрофиясын емдеуге Нусинерсен (Спинраза) препараты қажет. Бірақ оның біреуі 42 млн теңге тұрады. Өткен жылдың соңында ауруханаға 126 млн теңгеге осындай үш препарат сатып алынған.
«Жұлынның бұлшық ет атрофиясы немесе SMA – жұлынның алдыңғы мүйіздеріндегі моторлы нейрондарының үдемелі дегенерациясынан туындаған генетикалық гетерогенді тұқым қуалайтын әрі емделмейтін ауру. Басқаша айтқанда, адамның бұлшық еттері мүлдем жұмыс істемей қалады. Ал Нусинерсен (Спинраза) препараты осындай сырқатқа шалдыққан балалардың өмірін едәуір жеңілдетеді», деп хабарлады аурухананың баспасөз қызметі.
Ал өңірлік коммуникациялар қызметінің мәліметіне сүйенсек, былтыр «Қазақстан халқына» қоры арқылы атыраулық төрт науқас қымбат дәрімен қамтамасыз етілген. Облыстық денсаулық басқармасының ықпалымен үш науқас үшін сатып алынған дәрінің құны 380 млн теңгені құрайды. Бір науқас «Қазақстан халқына» қорына өзі жүгінген.
«Өткен жылдың сәуір айында Атырау облысынан «Берардинелли Сейптің жалпыланған липодистрофиясы» диагнозымен екі бала «Метрелептин» дәрілік затымен қамтылды. Дәрінің жалпы құны – 201 млн теңге. Ал қараша айында «Дюшенді бұлшықет дистрофиясы» диагнозы қойылған 18 жасқа толмаған науқас 179 млн теңге тұратын «Касимерсен» дәрілік препаратымен қамтылды. Атырау қаласынан «Қазақстан халқына» қорына өзі көмек алуға жүгінген онкологиялық есепте тұрған науқасқа «Рибоциклиб» дәрісі алынып берілген», деп мәлім етті өңірлік коммуникациялар қызметі.
Атырау облысы