2023 жылғы 29 наурызда Үндістанның Қазақстандағы Елшілігі «Астана» халықаралық қаржы орталығымен (АХҚО) бірлесіп Үндістан мен Қазақстан арасында машина жасау тауарлары мен қызметтері нарығын дамыту бойынша Бизнес-конференция ұйымдастырды, деп хабарлайды Egemen.kz.
Іс-шара Үндістан мен Қазақстан арасындағы машина жасау тауарлары мен қызметтері саласындағы ынтымақтастыққа серпін беруге арналған. Іс-шара гибридті форматта өтті. Талқылау Үндістан-Қазақстан инженерлік ынтымақтастығының болашағына және екі елдің ағымдағы ынтымақтастығына негізделген ең үздік қолжетімді заманауи шешімдерге бағытталған.
Үндістанның Қазақстандағы Елшісі Шубхдаршини трипати ханым өзінің құттықтау сөзінде Үндістанның машина жасау секторы соңғы бірнеше жылда инфрақұрылым мен өнеркәсіптік өндіріске инвестициялардың ұлғаюына байланысты айтарлықтай өсудің куәсі болғанын атап өтті. Өндіріс және инфрақұрылым секторларымен тығыз байланысты Машина жасау секторы Үндістан экономикасы үшін стратегиялық маңызға ие екенін Шубхдаршини Трипати ханым атап өтті.
Қазақстан тарапынан Қазақстанның Индустрия және инфрақұрылымдық даму вице-министрі Динара Щеглова құттықтау сөз сөйледі. Өз сөзінде ол Қазақстанда машина жасаудың өсу қарқыны тұрақтылық пен тиімділікті көрсететінін атап өтті. 2022 жылы сала өндірісінің көлемі 3,1 трлн теңгені құрады және 2021 жылмен салыстырғанда 30% - ға өсті (2,4 трлн теңге). Өз сөзін аяқтай отырып, ол үнділік серіктестерді ЕАЭО-дағы ішкі нарықтың және перспективалы өткізу нарықтарының үлкен көлеміне байланысты Қазақстан Республикасын индустрияландыруға қатысуға шақырды.
Үндістанның жетекші салалық органдардың өкілдері, атап айтқанда, Үндістанның қызметтерді экспорттауға жәрдемдесу Кеңесі (SEPC), Үндістанның машина жасау экспортына жәрдемдесу Кеңесі (EEPC) және инвестицияларды көтермелеу және ілгерілету жөніндегі жетекші агенттік Invest India Үндістанның[ компаниялардың әлеуетін көрсету және ынтымақтастықты кеңейту жолдарын айту мақсатында презентациялар жасады.
Қазақстан машина жасау одағы директорының орынбасары Қуаныш Тайшыбеков Қазақстанның машина жасау нарығына талдау жасады. Ол Одақ шетелдік кәсіпорындарға Қазақстанда бизнес жүргізу үшін қолайлы экономикалық, қаржылық және құқықтық жағдайларды түсіндіруде көмек көрсетуге дайын екенін атап өтті. Сөзін аяқтай отырып, ол Үндістан өнеркәсібінің өкілдерін 2023 жылы Қазақстандық машина жасау форумына қосылуға шақырды. АХҚО кеңесшісі Тимур Сембинов үнділік делегацияға АХҚО қызметімен таныстыру үшін презентация ұсынды.
Іс-шараға BMI bearings India, Van-Bent Minerals PVT, Distinct Techno Concept Pvt, Polymechplast Machines, Hilek Auto Industries, Rajendra Special Metals and alloys, Nexus alloys and Steels және т. б. сияқты жетекші Үнді инженерлік компаниялары, сондай-ақ қазақстандық Tengis Плюс, Амкадор Астана, Қазкомпрессор, Элпа, UK-Инжиниринг, Azam-KS сияқты компаниялар қатысты.