Риддердегі жылу қазандығынан тағы да өрт шығып, қалада төтенше жағдай жарияланды. Өрт бір емес, бірнеше қазандықтан шыққан. Артынша отын беру жолында да жарылыс болды. Демек жылу электр орталығының жаңа иелері жүктелген жауапкершілікті ойдағыдай орындай алмаған.
– Қаланың ЖЭО жұмысында үлкен кемшіліктер бар, жаңа меншік иесі қаңтардан бастап мәселені шеше қояйын деп құлық танытпады. 3 млрд теңгеден аса қарыздары және бар. Мазут, көмір жеткізу де үлкен проблема болып отыр. Электр энергиясы жағынан да сұрақ көп. Қараша айындағы шұғыл жөндеу, қалпына келтіру жұмыстарын жүргізген компаниялардың еңбекақысы да төленбеген көрінеді. Енді міне, тағы да өрт шықты, жарылыс болды, – дейді облыс әкімі Даниал Ахметов.
Қыстай жылуға жарымаған Риддер қаласының тұрғындары бұл мәселеден әбден зәрезап болған. Пәтерлердің суықтығына үйренісіп те кеткен секілді. Үйренісіп деймін, амалдың жоқтығы ғой. Атойлап әкімдіктің есігінде жүрсең де, бұл мәселенің түйіні жуық арада шешіле қояды дегенге сену қиын.
– Риддерде әлі қыс. Күн көзі шыққанмен, түн суық. Қыстай жылу құбырлары қанжылым ғана болып тұрды. Соңғы бір апта үй іші, тіптен суып кетті. Қазандыққа жаңа қожайын келді дегенді естіп, мәселе шешілер деп ойлап едік, бекер екен. Биыл әупірімдеп, жазға ілінерміз. Енді келер қысқа дейін бәрін жөндеп қойса ғой, – дейді Риддердің тұрғыны Мәулия Дөненбаева.
Бұл, әлбетте, барлық қала тұрғынының тілегі. Ендігі кезектегі күрмеуі қиын проблеманы шешудің жалқы жолы жылу орталығын коммуналдық меншікке беру деседі облыс басшылығы. Қазір облыс әкімінің айтуынша, отын мен қажетті жабдықты жеткізу мәселелері толығымен шешілді. Алайда мекеменің қарызы 3 млрд теңгеден асып кетті.
Сонымен қатар ШҚО прокуратурасы мамандарын тарта отырып, кәсіпорын қызметіне тексеру жұмыстары жүргізілді. Нәтижесінде, «Риддер ЖЭО» АҚ-ның техникалық жай-күйі талапқа толық сай емес екені анықталды. Ресми мәліметке сенсек, 240-тан аса заң бұзушылықтар анықталған.
Прокуратураның қадағалау актілері бойынша уәкілетті органдар ЖЭО басшылығына қатысты 11 млн теңгеден аса сома мөлшерінде әкімшілік жаза қолданып, бұзушылықтарды жою туралы нұсқама шығарды. Онымен қоймай, прокурорлық тексеру кезінде табиғи монополиялар туралы заңнаманы бұзу, яғни 548 млн теңге сомасына тарифтік смета мен инвестициялық бағдарлама қаражатын мақсатсыз жұмсау анықталды.
Облыс әкімі де жаңа инвестордың жабдықтарды жөндеуге қаражат жұмсамағанын айтады. Нәтижесінде, екінші қайтара төтенше жағдай жарияланып, қазандық жұмыстарын жүргізуді облыс басшылығы уақытша өз қолына алды.
– Біз Риддер ЖЭО-ның жаңа иесінен үміт жоқ екенін көріп отырмыз. Сондықтан, менің ойымша, жылу көзін коммуналдық меншікке беру керек, – деді Д.Ахметов.
Риддер қаласы