9 жылға бас бостандығынан айырылған Айболат Аманжоловтың жақындары сот шешімімен келіспейтінін жеткізді. Олар апелляциялық сотқа шағым түсірмек, деп хабарлайды Egemen.kz.
Марқұмның туыстары мен сотталушының анасы тергеудің атүсті жүргізілгенін айтып, жазықсыз сарбаздың сотталмауын сұрады. Адвокат та бұл шешімнің негізсіз екенін атап өтті.
«Танысқанына 4 күн болған балалар бір-бірін өлтіруі мүмкін емес, оған мотив жоқ», дейді адвокат Жанар Нусупбаева.
Әлібек Қалбайдың өліміне кінәлі деп танылған сарбаз небәрі 18 жаста. Ол үйінің үлкені. Отбасында Айболаттан кейін 6 бала бар.
Еске сала кетейік, бұған дейін атыраулық сарбазға қатысты сот үкімі шыққанын хабарлаған едік.