Қазақстанның Оман Сұлтандығындағы Елшісі Нажмедин Мұхаметәліұлы Оман Сауда, өнеркәсіп және инвестицияларды қолдау министрі Қайс әл-Юсефпен кездесу өткізді, деп хабарлайды Egemen.kz Сыртқы істер министрлігінің баспасөз қызметіне сілтеме жасап.
Кездесуде 2023 жылғы 8-9 маусымда өтетін Астана халықаралық форумға шақыру хаты табысталып, көзделіп отырған іс-шараның маңыздылығы мен күн тәртібі талқыланды. Қайс әл-Юсеф хатты ризашылықпен қабылдап, аталған форумға қызығушылық танытты.
Сонымен қатар, тараптар екіжақты сауда-экономикалық және инвестициялық қатынастарды кеңейту қажеттілігін талқылады. Атап айтқанда, құрылып отырған үкіметаралық комиссия шеңберінде қос елдің мүдделі мемлекеттік және жекеменшік ұйымдары арасындағы өзара іс-қимылды жандандыру жолдары қарастырылды.