Мәдениет және спорт министрі Асхат Оралов балалардың тегін үйірмелерге қатысуын қамтамасыз ету әлі де жалғасатынын айтты, деп хабарлайды Egemen.kz.
«Мемлекет басшысының тапсырмасына сәйкес, өскелең ұрпақтың шығармашылық және спорттық әлеуетін дамытуға үлкен көңіл бөлініп отыр. Бүгінде мемлекеттік шығармашылық және спорттық тапсырыс институты белсенді жүзеге асырылуда. Мәселен, 2022 жылы Жамбыл облысында 9 мыңнан астам бала мен жасөспірім тегін үйірмелермен және секциялармен қамтылды. Биыл біз осы жобаны жүзеге асыруды жалғастырамыз. Мемлекеттік спорттық және шығармашылық тапсырысты жалғастыру мақсатында 2023 жылы 560 мыңнан астам бала мен жасөспірімді қамту үшін жергілікті атқарушы органдардан 86,7 млрд теңге бөлінді», деді Асхат Оралов.