«Егеменнің» тілшісі – «Сөз зергері»

Биыл байқауға 300-ден аса адамнан 2 мың жұмыс келіп түсті. Оның басым көпшілігін (60 пайызы) аймақтағы ақпарат саласының өкілдері жолдады. Байқауға YouTube жобалар да қабыл­дан­ды. Осылайша, 7 аталым мен 3 арнайы сыйлық бойынша жеңім­паздар анықталды. Айта кетер­­лігі, жеңімпаздар қатарында «Egemen Qazaqstan» газетінің Ақ­мо­ла об­лысындағы меншікті тілшісі Бай­­қал Байәділ де бар.

Салтанатты рәсімді ашқан «Ama­nat» партиясының төрағасы Ерлан Қошанов ақпарат құрал­дарының өкілдерін кәсіби мере­келерімен құт­тықтап, бұл журна­листердің ғана мерекесі емес, ха­лықтық мейрам екенін атап өтті.

«Қоғам сапалы, шынайы және танымдық дүниелерді оқығысы келеді. Мұндай ақпаратты нақты дерек пен дәйекке сүйенетін журналист қана ұсына алады. Ол – сөздің қуаты мен қадірін білетін, жауапкершілігі жоғары, кәсібіне адал нағыз маман. БАҚ-тың бас­ты миссиясы да – осы. Сіздердің мақалаларыңыз бен сюжеттеріңіз қоғамды ұдайы алға жетелеп отыратын, ел дамуына ықпал ететін құндылықтарды дәріптейді. Бұл – патриотизм, адал еңбек, бей­бітшілік пен тұрақтылық, заң мен тәртіп, білімге құштарлық, туған жері мен төл мәдениетіне деген сүйіспеншілік. «Amanat» пар­тиясының байқауы осындай журна­листік жұмыстарды қолдауға бағыт­талған», деді партия төрағасы.

Сонымен, байқау комис­сиясы­ның шешімімен «Amanat» – 2023 Медиа сыйлығының» биылғы бәсе­ке­сінде «Еліміздегі реформалар туралы үздік материал» аталымы бо­йынша «Астана Ақшамы» газетінің шеф-редакторы Төлен Тілеубай, «Еңбек адамы туралы үздік материал» аталымы бойынша Қазақстан Журналистер одағының мүшесі Қойлыбай Асанов жеңіске жетті.

«Аймақ туралы ең үздік материал» аталымы бойынша Қазақ радиосының жүр­гізуші-редакто­ры Альмира Елім­сарина және «Informburo.kz» порталының шолу­шы­сы Оксана Трофимова, «Рухани-мәдени даму туралы үздік материал» аталымы бойын­ша Шалқар радиосы Алматы студиясының редактор-жүргізушісі Жанар Ора­зым­бетова шашасына шаң жұқ­тырған жоқ.

«Жастар туралы үздік мате­риал» аталымы бойынша «КТК» теле­арнасының редактор-жүргі­зушісі Әйгерім Асқарқызы мен «31 арна» жаңа­лықтар қыз­метінің аймақтағы тілшілер редакторы Айдана Шібі­кеева, «Алаш қозғалысы бойынша үздік материал» аталымы бойынша «Жетісу» телеарнасының продюсер-жур­­налисі Гүлжан Қызайбаева үздік деп танылды.

«Азаматтық борыш туралы үздік материал» аталымы бойынша «NUR.KZ» ақпараттық порталының тілшісі Юлия Абрамова және «Литер» республикалық қоғамдық-саяси газеті ақпарат бөлімінің меңгерушісі Темірлан Құспаев марапатталды. Ал Мағжан Жұ­мабаев атындағы «Сөз зергері» сыйлығы «Egemen Qazaqstan» газетінің Ақмола облысындағы меншікті тілшісі Байқал Байәділге бұйырды.

Шерхан Мұртаза және Ка­мал Смайылов атындағы «Те­ле­ви­зия үздігі» сыйлығын «Jibek joly» телеарнасының бағ­дарлама ав­торы-жүргізушісі Жанар Байсеміз бен «Астана» телеарнасының Қос­танайдағы меншікті тілшісі Заңғар Санай иеленді. «Белсенді азаматтық ұстанымы үшін» сый­лығын «Qasqa Jol» YouTube арна­сының автор-жүргізушісі Абай Тлен­шиев және «Turkistan Media Holding» ЖШС-ның басқарушы директоры Тельман Бейсенов алды.