Мәжіліс және Сенат депутаттары еліміздің түкпір-түкпірін аралап, халықпен кездесіп, өзекті мәселелерді талқылауын жалғастырып жатыр. Бұл жолы депутаттар әлеуметтік нысандар жұмысымен танысты.
Сенатор Сұлтан Дүйсембинов Талғар ауданында болған кезде бірқатар әлеуметтік нысандарды аралады және тұрғындарымен кездесу өткізді. Талғар қаласындағы 136 бала тәрбиеленетін және 18 тәрбиеші жұмыс істеп келе жатқан №8 балабақшаға барды. 1964 жылы салынған бұл балабақшада әлі күнге дейін жөндеу жұмыстары жасалмаған.
«Облыстық және аудандық депутаттар осы мәселе бойынша айтқаннан кейін бұл балабақшаға арнайы келдім. Егер менің қолдауым қажет болса, мен жан-жақты көмек көрсетуге дайынмын. Бұл нысан салынғаннан бері жөнделмеген болса, онда бұл мәселені бақылауға алу қажет», деп атап өтті С.Дүйсембинов.
Депутат сапар барысында жылыжай жұмысымен де танысты. Сенатор бұл нысанның жұмысы өңір экономикасының дамуына оң әсерін тигізетінін атап өтті.
* * *
Сенат депутаттары Жанна Асанова мен Нұрия Ниязова ҰҚК Шекара академиясының басшылығымен кездесті. Онда ұлттық қауіпсіздікті қамтамасыз ету саласындағы заңнаманы одан әрі жетілдіру мәселелерін талқылады.
Кездесу барысында академияны бітірген түлектерге сұраныс деңгейі, олардың жұмысқа орналасу пайызы, шекарашыларды жоғары оқу орнынан кейін және оған қосымша оқыту тәртібіне қатысты мәселелер көтерілді.
«Академия жалпы геосаяси жағдайға байланысты офицерлік кадрларды даярлауға қойылатын талаптардың да өсіп келе жатқанын ескеруі тиіс. Сенаттың Халықаралық қатынастар, қорғаныс және қауіпсіздік жөніндегі комитеті академия түлектерін еліміздің шекарасын қорғау жөніндегі міндеттерді абыроймен атқаруға мүмкіндік беретін қазіргі заманғы кәсіби құзыреттерді игеру үшін барлық қажетті жағдаймен қамтамасыз етуді маңызды деп санайды», деді Ж.Асанова.
Кездесуге қатысушылар академияның ғылыми-зерттеу қызметі және оның ұлттық қауіпсіздік пен әскери саладағы іргелі және қолданбалы зерттеулер мәселелерін де талқылады.
* * *
Мәжілістегі «Amanat» фракциясы мүшелерінің өңірлерге сапары жалғасып жатыр. Депутаттар Снежанна Имашева мен Нартай Аралбайұлы Орал қаласына барып, жол жөндеу жұмысымен танысты.
Оралдағы Шолохов көшесінің 6,1 шақырымын қайта жаңарту жұмысы жыл соңына дейін аяқталуға тиіс. Бүгінде жолдың әр бағытын үш жолақты етіп кеңейту және тротуар салу жұмысы жүріп жатыр. Жобаның жалпы құны – 4,2 млрд теңгеден асады.
Депутат Нартай Аралбайұлының пікірінше, «Мемлекеттік сатып алу туралы» заңның кейбір кемшін тұстары жол құрылысын жүргізу кезіндегі тендер өткізуді баяулатады. Соның салдарынан, жобалық-сметалық құжаттаманы әзірлеу, құрылыс материалдарын сатып алу секілді жұмыстар тежеледі.
«Мемлекет басшысы Қасым-Жомарт Тоқаев атап өткендей, Батыс Қазақстан облысындағы жолдардың сапасы өте төмен. Тіпті, бұған жауапты мекемелердің бірқатар басшысы жұмыстан да шығарылды. Жол құрылысын жүргізетін қай компанияның ставкасы жоғары, әлеуеті зор болса, сол жеңіп шығады. Ал бұл шетелдік компания болса, бақылаудың жеткіліксіздігінен жұмыс сапасы да төмен болуы мүмкін. «Мемлекеттік сатып алу туралы» заңның кейбір кемшін тұстары құрылыс нысандарын жоспарлау жүйесіне теріс әсер етеді. Сондықтан біз бұл мәселені Мәжілісте көтермекпіз», деді Н.Аралбайұлы.
Өз кезегінде, депутат Снежанна Имашева Батыс Қазақстан облысындағы жолдардың тек 46 пайызы ғана жақсы жағдайда екенін атап өтті. 2027 жылға қарай партияның сайлауалды уәделерін жүзеге асыру аясында жергілікті маңызы бар жолдардың жақсы және қанағаттанарлық жағдайдағы үлесі 72 пайызға дейін ұлғаяды. Атап айтқанда, қалаларда 66 шақырым жол күрделі жөндеуден өтеді.
«Орал – шекара маңындағы қала. Ол көп жағдайда транзит шаһар саналады. Мәселен, Самарадан жеткен жүк көліктері Шолохов көшесін басып өтеді. Шамадан тыс жүк тиелген мұндай көліктер асфальтты үгітеді. Жол құрылысының әр кезеңі аяқтала салысымен арнайы сараптама жүргізу қажет. Материал сапасын да мұқият бақылау керек. Мердігер бұл жолға 3 жылдық кепіл береді. Біз жөндеу жұмысының барысын, сапасын қадағалаймыз», деді Нартай Аралбайұлы.
Сондай-ақ депутаттар өңірде жол құрылысына бюджеттен аз қаражат бөлінетініне назар аударды. Бұған қоса, облыста қиыршық тас пен битум тапшылығы байқалады.
* * *
Мәжіліс депутаты, «Amanat» партиясы фракциясының мүшесі Ерлан Саиров Шығыс Қазақстан облысындағы шекаралық аймақ Зайсан ауданына барып, «Зайсан орман шаруашылығы» орманшылармен кездесті.
«Қаншама жыл осы мекемеде қызмет атқарып жүреміз. Біздегі бірден бір мәселе – өрт сөндіруге арналған техникалардың тозығы жеткен. Қазір техниканың озған, дамыған уақыты ғой. Бірақ біз әлі күнге дейін сол ескі құрал-жабдықтармен жұмыс істейміз. Сіздерден осы мәселенің шешілуіне ықпал жасауларыңызды сұраймыз», деді Орман өрт сөндіру стансасының басшысы Аманбек Жасаров.
Мамандардың айтуынша орман шаруашылығында жұмыс жасайтын техникалардың әбден тозығы жеткен. Сондай-ақ ондағы қызметкерлердің жалақысы да мардымсыз.
«Мұндағы жұмыс уақытына қарамастан, қызметкерлердің жалақысы өте аз. Олар күндіз-түні қолайлы, қолайсыз ауа райында да жұмыс істейді. Сондықтан жалақы мәселесі реттелсе жақсы болар еді», деді Зайсан орман шаруашылығы басшысының міндетін атқарушы Айдын Ескендіров.
«Бәріңізге белгілі жақында Абай облысында болған орман өрті осы салада түйткілді мәселелердің бар екенін көрсетті. Өз кезегінде Мемлекет басшысы да саладағы кемшіліктерді анықтап, жою қажеттігін атап өтті. Сонымен қатар осы жылдың 1 шілдесінен бастап орманшылардың айлығы көтерілді. Ал материалдық-техникалық базаны жақсарту жұмыстары кезең-кезеңімен жүзеге асырылады деп мәлімдеген болатын министрлік. Бұл мәселе бойынша Мәжіліс депутаттары тиісті министрліктің жұмысын назарда ұстайды», деді Е.Саиров.