Биыл елордадағы бірегей өнер ордасы – Астана Балет театрына 10 жыл толды. Осы жылдар ішінде театр репертуары түрлі жанрдағы отандық және әлемдік айтулы хореографиялық қойылымдармен толығып, көрермендер көңілінен орын алды. Өткен жұмада аталған өнер ордасы мерейтойлық маусымын Astana Ballet Gala концерті қорытындылады. Мәдениет және спорт министрлігінің қолдауымен өткен музыкалық кеште театрдың 10 жылдық тарихында сахналанған үздік туындылардан үзінділер ұсынылды.
– Біздің театрымыз – ел өнерінің дамуына зор үлесін қосып жүрген дарынды әртістердің, хореографтардың, ұстаздардың көркем ойлары мен арман-мұратын іске асыратын киелі өнер ордасы. Мақсатымыз – көрермендер сенімін ақтайтын бағдарлама ұсыну. Мұнда өнерге деген құштарлығымыз, махаббатымыз көрініс тауып, әртістердің талантына куә бола аласыз. Біз театрды жақсы көретін жұртшылықтың көңілінен шығу үшін әр детальге мұқият назар аударамыз,– дейді театр директоры Александр Совостьянов.
Мерекелік концертте театрдың талантты әртістері «Корсар», «Спартак», «Кармен-сюита», «Махаббат туралы аңыз», тағы басқа да классикалық және неоклассикалық спектакльдерінен, бразилиялық хореограф Рикардо Амарантенің «Diversity», «Love Fear Loss», «A Fuego Lento» туындыларынан, авторлық және ұлттық балеттерден үзінділер көрсетті. Бұларды театр қазынасын байытып, абыройын асырған қойылымдар деп айтуға болады. Сондай-ақ «Шығыс рапсодиясы» және «Ұлы дала мұрасы» концерттік бағдарламасына енген хореографиялық миниатюралар көрермендерді керемет әсерге бөледі. Маэстро Арман Оразғалиевтің жетекшілігіндегі театрдың симфониялық оркестрінің орындауындағы композициялар тыңдарман жүрегін толқытты.
«Театрымыздың тарихы – соңғы он жылдағы отандық хореография өнерінің даму жылнамасы. Бүгінгі кештегі бағдарламаның маңызы өте зор. Себебі бұл біздің бірегей шығармашылығымыздың үлгісі іспетті. Осы он жыл ішінде сахналанған үздік туындыларымыздан үзінділер көрсетіп, көрерменге ұмытылмас эмоция сыйлауды мақсат еттік», дейді хореограф Айгүл Тәти.
Шынында да, онжылдық асуды жемісті бағындырған балет театрында өткен ғажайып кеш – орындаушылық техника мен музыка үйлесім тапқан шынайы өнер туындысына айналды.