Еңбек адамына анықтама беріп көрейікші? Біздіңше, еңбек адамы дегеніміз – ерінбеген адам. Мемлекетке алақан жаймай-ақ, өзінің идеясымен шағын кәсіп бастап, өзге де адамдардың басын біріктіріп, бір мақсат аясында жұмылдыра алған тұлға. Демек кез келген азамат қолынан келетін істі қорықпай бірінші бастаған жан. Ал Жетісуда – мұндай еңбек адамдары көп.
Мәселен, Кербұлақ ауданына қарасты Сарыөзек ауылының тұрғыны Айжан Артықбаеваны алып қарайықшы. Өз кәсібін шыр айналдырып, ауылдастарының көз қуанышына айналып отыр. Бала күнінен өзі сүйіп жасайтын тәтті тағамдарды халыққа ұсынып, кәсіптің көзі еткен. Кәсіпкер сүйген істің еш уақытта шаршатпайтынын, керісінше, одан ләззат алып, іске деген құлшынысты арттыратынын ерекше сезіммен жеткізді.
Айжан мектепті «Алтын белгіге» бітірген. Сөйтіп, Әл-Фараби атындағы ҚазҰУ-дің физика-математика факультетіне оқуға түсіп, аяқтаған соң есепшілікті де оқыған. Екі жоғары білімі бар маманға бұл бизнесті жүргізуге қазір үлкен көмегін тигізіп жатыр. Ол мұны әңгімелесу кезінде айтты.
«Адам өзі қалаған іспен айналысқанда ғана үлкен жетістікке қол жеткізе алады. Мен оған сүйген кәсібіммен шұғылдану кезінде терең көз жеткіздім. Бизнестен бірден пайда табам деп ойлау – қате. Бұл үлкен шығынға ұшыратады. Сүйген істің барлық қиындығына жемісін көргенше шыдау керек. Бірде сүрінсең, бірде қайта тұрасың, кедергілерден де өтесің. Осылайша шыңдалып, ұшталып барып бір ізге түсесің. Әр істі өз маманына тапсырған дұрыс. Сонда ғана жұмыс жанданады. Бизнесте білімді, жан-жақты болу басты шарт екенін есте ұстаған жөн», дейді кәсіпкер келіншек.
Қазір ол – «Кәрібаева» жеке кәсіпкерлігінің жетекшісі. Кәсіпкердің тағам өнімдері «Дастарқан» атты тауарлық брендпен шығарылады. Тағам дайындауға қажет өнімдері өздерінің «Нұрдәулет» шаруа қожалығынан әкелінеді. Бұл шаруашылықта 500-600 бас ұсақ мал, 100 бас ірі қара бағылады. Сондай-ақ 300 шақты тауық бар. Яғни ет, сүт, жұмыртқа өнімдерінің бәрі тағамдарды әзірлеуге қолданылады. Ұнды сатып алады. Дайын өнімдері – 500-600 адамға шақталған той-томалақ, ас мәзірі сияқты іс-шараларды өткізуге сұраныста.
Тауық, сиыр етінен мәнті, тұшпара, котлет, самса, шұжық өнімдері дайындалады. Ал сүттен кілегей, ірімшік, құрт жасайды. Қол жаймасы мен бауырсақ, тоқаш, чебурек, басқа да нан түрлеріне тапсырыс көп. Тұрақты түрде сұраныс беретіндері де аз емес. Басым бөлігі – Сарыөзек ауылының тұрғындары. Өнімдері әлеуметтік желідегі арнайы парақша арқылы жарнамаланады. Тұтынушылар көбіне сол арқылы байланысып, Алматы, Талдықорған қаласынан тапсырыс береді. Себебі олардың химиялық қоспасыз дайындалатын табиғи таза өнімдерге қызығушылығы жоғары. Яғни тауар өтімділігі талапқа сай.
«Бізде 6 адам жұмыс істейді. Бәрі – жергілікті тұрғындар. Олардың арнайы кәсіптік білімі болмаса да істегі тәжірибелері мол. Қыз-келіншектер әртүрлі іс-шараларға қатысып, тәжірибелі мамандардан білмегендерін үйреніп, біліктілігін жетілдіріп қайтуға мүмкіндік жасалады. Ақылы курстарға да қатысамыз. Тағам әзірлеу Оңтүстікте жақсы дамыған. Жасыратыны жоқ, қазір бізде тамақ өнеркәсібі бойынша маман табу қиын. Сол себепті жұмыспен қамту орталығына сұрау жібереміз. Ал осы салада білім алған жастар бізге келмейді, ірі қалаларға кетеді. Мәскеуден оқу бітірген ет технологымен де тығыз байланыста жұмыс істейміз», дейді А.Артықбаева.
Кәсіпкер «Бір ауыл, бір өнім» жобасына ұсыныс берген. Алдағы уақытта тауар айналымын жақсартып, бәсекеге қабілеттілікті арттыру үшін нарықты кеңейту көзделіп отыр. Сондай-ақ дайын өнімдерді экспортқа шығару жоспарда бар.