Кәсібінен нәсібін тауып жүрген жандар үшін өз ісінің алға басуын қамтамасыз ететін әрбір мүмкіндік маңызды. Егер ішкі нарықты қойып сыртқа шығатындай жағдай қалыптасса, неге қуанбасқа?
Ұлытаулық кәсіпкерлер үшін көп кешікпей осындай мүмкіндіктер қалыптаса бастамақ.
«QazTrade» сауда саясатын дамыту орталығы» АҚ Бас директорының бірінші орынбасары Нұрлан Құлбатыров Ұлытау Өңірлік кәсіпкерлер палатасында шағын және орта бизнес өкілдерімен кездесіп, олармен халықаралық нарыққа еніп, өз өнімдерін экспортқа шығару туралы пікір алмасты.
«QazTrade» АҚ кәсіпкерлерге жан-жақты көмек көрсетуге әзір. Отандық кәсіпкерлер арасында экспортқа деген қызығушылық жыл сайын артып келеді. Біз шикізаттық емес, дайын өнімді экспорттау бағытын ұстанамыз», деді Н.Құлбатыров.
Сондай-ақ ол жаңадан енгізіліп жатқан «Ready 4 Trade Орталық Азия жобасы» туралы айтып берді. Бұл жоба арқылы кәсіпкер өз өнімдерін Еуропа елдеріне барынша тез әрі жеңіл жолмен жеткізе алады екен.
Экспорттың ел экономикасы үшін маңызы зор екені айтпаса да түсінікті. Енді бұл ретте де ұлытаулық кәсіпкерлердің үлесі арта түседі деген сенім бар. Мұндай мүмкіндік тауарлар, жұмыстар мен қызметтер өндірісін ынталандырып қана қоймайды, сонымен қатар экономиканың даму қарқынын нығайтады және жалпы ішкі өнімнің өсуін жеделдетеді, сауда балансын және халықаралық нарықтағы ұлттық валютаның позициясын нығайтады.