Қарияның аяғын аман алып қалды

ӘМСҚ Астана филиалының қызметкерлеріне СITY клини­касының мүмкіндіктерін таныс­тыр­ған бас дәрігер Қанат Дүй­сен­баев емханада өте сирек кез­­де­сетін ерекше операциялар жа­салатынын жеткізген. Осы­ған байланысты игілікті істің мән-жайын дәрігерлерден сұрап көр­дік.

«CITY емханасында 2023 жылғы 16 мамырдан бастап осы­ған дейін МӘМС жүйесі­мен адам аяғында болатын артерия­лық қан айналымын қалпына кел­тіру бойынша 10 күрделі операция жасалды», дейді стационар және оперблок меңгерушісі Ғалия Әбе­жанова.

Елордадағы бұл емхана МӘМС жү­йесі бойынша тегін ем ал­ған алғашқы емделуші ұзақ уа­қыт­тан бері атеросклероздан зар­дап шеккен 82 жастағы қарт кісі аяғының тамырлары толы­ғымен бітеліп, соның салдарынан аяғында қатты ауырсыну туды­ратын трофикалық жаралар пайда болған. Тіпті ауырсынуды басатын дәрілер де әсер етпейтін көрінеді.

«Созылмалы қабынуға кез келген уақытта инфекция түсіп, адамның бүкіл ағзасына кері әсер етеді және сау ағзалардың жұмысын бұзуы мүмкін. Мұндай аурул­арды емдеудің түрлі әдіс­тері бар. Бірақ аяқты сақтап қалу мүмкін бола бермейді. Ал бұл науқастың жағдайында тіпті күр­делі болды. Мұндай жағдайда көбінесе ауыр сырқатты ескере отырып, науқасқа операция жасаудан бас тартуды ұсынуы мүмкін», дейді дәрігерлер.

Қарттың науқасы қатты ас­қынып кеткендігіне және созыл­малы сырқатына қарамастан, дәрігерлер жергілікті анестезия арқылы операция жасауға ше­шім қабылдаған. Осылайша, дәрі­герлер аяқ тамырларының қан жүруін қалпына келтірген. Нәтижесінде, қысқа уақыт ішінде трофикалық жаралар толық жазылып, науқастың аяғын кесуден сақтап қалды. Яғни қарияны мүгедек болып қалудан аман сақтаған.

«Әкемнің ауырғанына 20 жылдан асты. Бұрын дәрігер­лер көптеген дәрі-дәрмек тағайын­дай­тын, онымен ауырсынуды басуға болатын. Бірақ кейінгі бірнеше жылда дәрілер әсер етпейтін болды. Ауырсыну басылмай, әкем ұйқыдан қалды. Бірнеше тексерулер мен консультациялардан кейін біз CITY емханасына бардық. КТ зерттеуін жүргізу кезінде ангиохирург Айдар Парманов әкемнің аурудан зардап шегуінің себебі неде екенін көрсетіп, түсіндірді. Бұл кезде аяғы қарайып кеткен еді. Дәрігер «бізде енді уақыт жоқ, аяқты аман сақтап қалу керек» деді. Себебі операция жасалмаса, дерті дендеп кетуі мүмкін екен. Біз әкеміздің аяғын сақтап қалуға мүмкіндік бар екеніне қуанып, дереу қан талдауларын тапсырып, тексерулерден өткізіп, хирургиялық емдеуге дайындай бастадық. Ауруханаға жатқызғаннан кейін дәрігерлер әкемізге МӘМС бойынша тегін операция жасады. Қазір әкеміз өзін жақсы сезінеді және біраз жылдан соң түнде тыныш ұйық­тай­тын болды. Бұл ретте ақ халатты дәрігерлерге алғысымыз шексіз!» дейді науқастың балалары.

Мамандардың айтуынша, мұндай операция қан тамырлары тәжірибесінде өте сирек жасалады. Бұл өз кезегінде елордада қан тамырлары хирургиясы әдістерінің одан әрі дамуына, қазіргі заманғы әлемдік деңгейде хирургиялық көмектің дамыған әдістерін игеруге және енгізуге сенімділік береді. Сондай-ақ аталған емхананың ангиохирург дәрігері 76 және 85 жастағы нау­қастарға да осыған ұқсас операция жасапты. Бұл операциялар да медициналық сақтандыру қоры есебінен жүргізілген.

«Бұл операциялар жергілікті анес­тезия арқылы жасал­ды. Опера­цияның негізі тәсілі нау­қастың қан ағымын қал­пы­на келтіру үшін оның өз күре­та­мырын қолданамыз. Ол дайын­дал­ғаннан кейін артерия­лар­ға тігіледі, нәтиже­сінде күре­тамыр шунт қызметін атқарады, одан кейін ол артерияланады да, ағзаларды қанмен қамтамасыз етеді. Бұл жағдайда күретамырды толығымен оқшаулаудың қажеті жоқ, өйткені бұл операциялар классикалық түрінде жасалады», дейді ангиохирург Айдар Төлегенұлы.

P.S: 2018 жылы іссапар­мен Шымкент қаласында жүргенімізде сол жердегі бір қаламгер ағамыздың үйінде қонақта болдық. Көп тағылымды әңгіме айтып, шыға­рып салған еді. Арада алапат ковид індеті болды, сөйтіп былтыр Шымкентке тағы жолымыз түсті. Бұл жолы ағамызға арнайы сәлем бере кетуге өзіміз барғанбыз. Қазақ мәдениетіне елеулі еңбек сіңірген ағамыз бір аяғымен отыр, екінші аяғы санынан төмен жоқ. Біздің жүзіміздегі сұрақты оқып қойған ағамыз мән-жайды бірден түсіндірді. Аяқтағы қан тамырлардың бітелуі және жарылуы салдарынан башпайдан бастап қарайып, шіри бастаған. Бұл шіру екінші аяққа әсер етсе, екі аяғынан бірдей айырылады деген дәрігерлер бір аяғын кесіп тастапты. Жоғарыда айтылған операцияны естігенде оймызға осы қаламгер ағамыздың жағ­дайы еріксіз ойға оралып еді.