Жаңа оқу жылы жаңа ғимараттан басталды

Кеңес Одағының баты­ры Ах­медияр Құсайынов атын­да­ғы білім ордасының көне ғи­ма­раты әбден ескіріп, апатты деп танылған еді. Ша­ғын ауыл болса да шаруасы шашырамай, іргесі берік тұр­ған елді мекенге жаңа мектеп ғимаратын салуды аудан, облыс басшылары да, депутаттар да қолдады. Тіпті бұл бастама «Amanat» партиясының сайлауалды бағдарламасына еніп, тиісті қаражат бөлінді. Сөйтіп 2021 жылы 108 оқушыға арналған жаңа мектептің құ­ры­лысы басталған. Міне, Жұлдыз ауылының тұрғын­дарын шексіз қуанышқа бөлеген күн де жетті. 2023 жылдың жаңа оқу жылын батыр атындағы мектеп оқушылары жаңа ғимаратта қарсы алатын болды.

23 тамызда ауыл үшін маңызы зор нысанның ашылу салтанатына Батыс Қазақстан облысының әкімі Нариман Төреғалиев, об­лыстық мәслихат төрағасы Мұ­рат Мұқаев, облыстық білім басқармасының басшысы Ай­гүл Мыңбаева, Қазталов ауданы­ның әкімі Асланбек Сарқұлов, мәслихат депутаттары арнайы қатысты. Өңір басшысы ауыл тұрғындарын, мектеп ұжымын және оқушыларды қуанышты оқи­ғамен құттықтап, мектеп ұжы­мына теледидар сыйға тартты. Облыс әкімі өз сөзінде Мемлекет басшысы Қасым-Жомарт Тоқаевтың «үш ауысымды және апатты мектептердің санын азайту керек» деген тапсырмасына сәйкес өңірде жүйелі жұмыс атқарылып жатқанын айтып өтті.

Шынын айтсақ, өңірде қол­­­ға алынған мектеп құ­ры­­лыста­рының келісілген уа­қы­­тында аяқ­талмай, кесте­ден кешігіп қалу оқиғасы жиі­леп кетті. Жұл­дыз мекте­бінің құрылысы да 2021 жылы басталғанымен, 8 ай­ға жоспарланған құрылыс 2 жыл­ға созылып, бітпей тұр­ған болатын. Жұлдыз мектебі­нің құрылысын әуелде «АлауҚұры­лыс» ЖШС бастап, аяқсыз қал­дырды. Н.Төреғалиев облыс тізгінін ұстағалы бері бұл мәсе­лені жеке бақылауына алды. Сөйтіп өңірде осы салада тәжі­ри­бесі мол «Альтаир» ЖШС мек­теп құрылысын толығымен сапа­лы түрде аяқтап шықты. Облыс әкімінің қадағалауымен өңірде «сақалды құрылысқа» айналған бірнеше нысанға жан бітті.

– Жұлдыз ауылында 40 жыл­дан астам уақыт тұрып жатырмыз. Еңбек өтілім де батыр атын­дағы мектеп қабырғасында өтті. Ауылымызда жаңа мектеп салу мәселесі көптен бері айтылып жүрген еді. Енді міне, бүгін жаңа ғимаратқа кіріп, қуанып жатырмыз. Осы мәселенің оң­тай­лы шешілуіне атсалысқан аза­маттарға, құрылысшыларға ал­ғы­сымыз шексіз. Мектеп құ­ры­лысы жақсы және сапалы жүр­­­гізілді деп нық сеніммен ай­та аламын, – дейді Жұлдыз ауы­лы­ның сыйлы ақсақалы Өтеп Тө­леуов ризашылығын білдіріп.

Жаңа мектептің ашылу салтанатына ауылдың үлкен-кішісі түгел жиналғаны айтпаса да түсінікті ғой. Салтанатты шарада «Қыз Жібек» жас термешілер ансамблі өнер көрсетіп, үлкен­дердің батасын алды. Құрылыс жұмысын жүргізген мердігер «Альтаир» ЖШС директоры Нұрлан Қуанғалиев жаңа нысан­ның ашылуымен ауылдастарды құттықтап, мектеп директорына мектептің символды кілтін табыс етті.

Осы мектепті 1984 жылы бі­тір­ген түлектер атынан сөз алған Батыс Қазақстан облыстық «Aqjaiyq» телеарнасының тіл­шісі Ақболат Мұстажапұлы ауыл­дастарын жаңа оқу жылымен құттықтап, мектеп оқушы­ларына спорттық киімдер мен құралдар тарту етті.

Сарыөзеннің бойында қо­ныс тепкен Жұлдыз ауылы – бо­­ла­шағы бар елді мекендер қа­та­­рында. Орта мектеп пен оның жанындағы шағын орта­лық­­та 130 бала білім алып, тәр­бие­­ленуде. Ауылдың дамуын, бо­лашағын дәлелдейтін бір көрсет­кіш құрылыс қой. Кейінгі үш жылда ауылда оншақты за­ма­­науи үй жаңадан салыныпты. Енді міне, су жаңа мектеп ғи­м­а­­­ра­ты ауылдың ажарын аша түсті.

Бұдан кейін облыс әкімі Н.Төреғалиев Қазталов ауданы орталығындағы 600 балаға арналған Алма Оразбаева атын­дағы жалпы орта білім беретін мектептің құрылысымен де та­­нысты. Бұл мектептің де құ­ры­лыс жұмысы түрлі себеппен бірнеше жылға созылып келеді. Құрылысқа жауапты мер­дігер «Жиенбай» ЖШС-ның директоры Александр Қа­рағойшиннің айтуынша, биыл­ғы оқу жылы­ның екін­ші тоқ­санынан бастап оқушылар жаңа мектепте оқи­ды. Нариман Төреғалиұлы мер­дігер мекеменің басшысына құрылыс жұмысын уәделі мер­зімде аяқ­тауды тапсырды.

– Аудан орталығындағы мектеп құрылысы білім күні – 1 қыркүйекте аяқталмайтыны анық. Біз қазір құрылысшыларға екі ай мұрсат беріп отырмыз. 1 қарашаға дейін барлық жұмыс тиісті деңгейде атқарылуы керек. Мердігер «Жиенбай» ЖШС-ның басшылығына мектеп құрылысын сапалы жүргізуді тапсырамын. Бұл нысан менің жеке бақылауымда болады, – деді Н.Төреғалиев.

«Қазталов ауданында қазіргі 20 орта, 8 негізгі және 7 бастауыш мектеп жұмыс істеп тұр. Осындағы 427 сынып-кешенде 5 216 оқушы білім алады. 1 250 балдырған 15 мемлекеттік және бір жекеменшік балабақшада тәрбиеленуде. 1 837 баланы қамтып отырған 4 қосымша білім беру ұйымы тағы бар. Барлық мектеп телефон байланысымен және интернетпен қамтылған. Сонымен қатар 22 мектеп жанында 351 оқушыны қамтыған шағын, орта­лықтар жұмыс істейді», дейді Қаз­талов ауданының әкімі Ас­ланбек Сарқұлов.

Батыс Қазақстан облысы