Жыл сайын Сырдария арнасының арнасы төмендей беруі дүйім жұртты ойландырып жүрген мәселенің бастысы еді. Бұл әсіресе, аграрлық өңір саналатын Сыр бойы диқандарының арқасын аяздай қарып келді десек, ақиқаттың ауылынан алыстай қоймаспыз.
Шаруалардың қатысуымен бұл кәсіпкерлер палатасында талай мәрте талқыға да түсті. Осы мәселемен айналысатын арнайы министрліктің құрылатындығы егінші жұрттың ертеңге деген үмітін оятып отыр. Бұл бір жағынан Президент айтқан агроөнеркәсіп кешенінің әлеуетін толық қолдануға да сеп болар еді. Қызылорда өңірінің мүмкіндігі оған толық жетеді. Биылдан қолға алынған «Ауыл аманаты» жобасы да елдің еңсесін тіктей түсері сөзсіз.
Сонымен қатар салық саясатындағы жазалау емес, ескерту керек деген ұстаным, мемлекеттің отандық өнім өндірушілерді қолдауды жүйелі жалғастыруы, шағын және орта кәсіпкерлікті қолдайтын кешенді бағдарлама әзірленетіндігі Әділетті Қазақстанның жаңа экономикалық бағдарының болашағына сендіреді.
Пірмұхаммед СЫЗДЫҚОВ,
Қызылорда облысы
кәсіпкерлер палатасының директоры