Алматыны бес күн бойы опера мен балеттің жауһарларымен думанға бөлеген халықаралық фестиваль ең соңында үлкен концертпен аяқталды. Классикалық өнердің дарабоздары “Аққу көлі”, “Жизель” балеттерінде жарқырап, “Қарғаның мәткесі”, “Богема” операларында сайрады.
Абай атындағы мемлекеттік академиялық опера және балет театры “JTІ Kazakhstan” компаниясымен бірігіп ұйымдастырған XV қазақстандық халықаралық фестиваль бекзат өнердің өрлеуіне өлшеусіз үлес қосып жүрген әлемдік опера және балеттің жарық жұлдыздарының өнерін жұртшылыққа ұсынды.
Осылайша Абай атындағы мемлекеттік опера және балет театры осындай фестивальдарды өткізу дәстүрін жаңғыртып, жылына 4 рет өткізуді жоспарлап отыр.
Қазақстанға осы фестиваль деңгейдегідей опера-балет жұлдыздары келгенде, еліміз үшін үш мәселе шешіледі. Біріншіден, бұл жергілікті әртістер үшін үлкен шеберлік дәрістері, екіншіден, бұл зал толы көрермен мен өнер майталмандарының сахналық қарым-қатынасы. Өйткені, әртіс үшін сахна машықтанып, өнерін паш етуге мүмкіндік беретін жалғыз мектеп. Үшіншіден, біздің тыңдармандар айтулы жұлдыздарды өз саңлақтарымызбен салыстырып, Қазақстанда да үлкен өнер әлеуетінің, бағалауға тұрарлық майталмандардың бар екенін түсіне алады” дейді өнертанушылар.
Қысқасы, 5 күн бойы Алматы көрермендеріне әлемдік өнер жауһарларымен, опера мен балеттің әлемге аты мәшһүр жұлдыздарымен қауышу мүмкіндігі туды. Итальяндық композитор Пьер-Доминик Поннель, ресейлік дирижер Андрей Аниханов, Ресейдің Үлкен театрының примасы Анна Антоничева, Санкт-Петербургтегі Мария театрының балет солистері Александр Волчков пен балерина Анатасия Волочкова, әлемдік опера жұлдызы Нетта Ор, Санкт-Петербургтегі Мария театрының баритоны Виктор Черномырцев, Украина ұлттық опера театрының сопраносы Татьяна Анисимова өнер көрсетіп қана қоймай, журналистерге тамаша сұхбаттар беруге де үлгеріп жатты.
Айнаш ЕСАЛИ,
АЛМАТЫ.