Ел Президенті мақұлдап, Үкімет бекіткен «Ұлытау облысын әлеуметтік-экономикалық дамытудың 2022-2026 жылдарға арналған кешенді жоспары» аясында көзделген іс-шаралардың бірі – облыс орталығының еліміздің басқа өңірлерімен әуе жолы арқылы байланысын қамтамасыз ету болатын. Бұған дейін қалыптасқан Астана, Алматы, Қарағанды қалаларымен әуе арқылы қатынас қатарына енді Шымкент қаласы да қосылды.
Өйткені 11 қазаннан бастап «Шымкент – Жезқазған – Шымкент» бағыты бойынша әуе рейсі «QAZAQ AIR» әуе компаниясының канадалық «De-Havilland Dash 8-Q400» замануи ұшағы арқылы әзірге аптасына екі рет, сәрсенбі, жексенбі күндері қатынайтын болады.
Бұл бағытты облыс әкімдігі бюджет қаржысы есебінен субсидия жасау арқылы жүзеге асырады.
– Билет құны 15 мың теңге болып белгіленді. 14 жасқа толмаған балалар елу пайыз жеңілдікті пайдалана алады. Біздің ойымызша бұл – қалтаға салмақ түсірмейтін баға, – дейді Ұлытау облысы жолаушылар көлігі және автокөлік жолдары басқармасының бөлім басшысы Ернұр Еділбаев.
Бұрын Ұлытау жақтан Шымкентке тікелей автокөлік те, пойыз да қатынамағанын ескерсек, баратын жерге бар-жоғы 1 сағат 40 минутта зыр еткізетін ұшақтың билет бағасы шынында да қымбат деуге келмейді.
Алдағы уақытта Жезқазған әуежайынан сан бағытқа ұшатын ұшақтар көбейе түспек. Өйткені қазір облыс басшылығы халық сұранысына сәйкес Өскемен, Балқаш, Ақтау қалаларына әуе қатынасын жолға қою мәселесі реттеу бағытында жұмыс істеп жатыр.
Ұлытау облысы