Оқушы есебінен бизнеске жол жоқ

Облыс әкімінің бірінші орын­ба­сары Нұрлан Әбдірахым Ал­ма­ты облысының білім сапасын арттырудың 2023-2029 жыл­дарға арналған аймақтық жол картасы бекітілгенін, соған сәй­кес жан-жақты жұмыстар жүргі­зіліп жатқанын тілге тиек етті. Ведомство басшысымен өткен кез­десуде депутаттар өткір де өзек­ті мәселелерді алға тартты. Онда кейбір асханалардың талапқа сай еместігі, тамақтандыруды ұйым­дастырудағы кемшіліктер, оқу­шы­лар тасымалындағы жүргі­зу­шілер жалақысының мар­ды­м­­сыздығы, спортзал, пән кабинет­терінің жетіспеушілігі мен жаб­дық­талуындағы олқылықтар, мектептердегі мейірбике тапшы­лығы сынды бірқатар мәселені ортаға салды.

– Біздің міндетіміз – өскелең ұрпақты қауіпсіз және жайлы ортада жан-жақты дамытуды қам­тамасыз ету. Министрлік негізгі мәселелерді шешуде жер­гілікті атқарушы органды қолдауға дайын. Білім беру инфра­құрылымын дамытумен қатар, оқыту сапасын арттырып, тәрбие жұмыстарын күшейтуге, сондай-ақ білім беру ұйымдарын біліктілігі жоғары кадрлармен қамтамасыз етуге ерекше көңіл бөлінеді, – деген Ғани Бектайұлы депутаттар сауалының аяқсыз қалмайтынын, мәселелердің оң шешім табуы назарға алынатынын айтты. Сон­дай-ақ ведомство басшысы бала­ларды оқыту мен тәрбиелеуде отбасы мен мектептің өзара байланысын нығайту, позитивті ата-ана мәдениетін дамыту, ең бас­тысы, баланың есебінен бизнес жасауға болмайтынын айрықша атады.

Бұдан кейін Оқу-ағарту ми­нистрі мектеп парламентінің көшбасшыларымен кездесті. Олардың қатарында джиу-джит­су­дан 7 дүркін әлем чемпионы Жібек Құ­лымбетова, «Славян базары-2023» жеңім­пазы Шер­хан Арыстан, халық­аралық және республикалық олимпиа­да­лар­дың жүлдегерлері болды. Кездесу барысында оқушылар ми­нистрге өздерін толғандыратын сұрақтарын қойып, жетіс­тік­тері және болашақ мақсаттары туралы айтып берді. Оқу-ағарту министрі оқушыларды жақсы оқумен қатар, табандылыққа, мақсатшылдыққа шақыр­ды. Жіберілген қателіктен қорықпауға, керісінше одан сабақ алып, қайталамау қажеттігін құ­лағ­дар етті. Арадағы емен-жар­қын диалогтен соң Шерхан Арыс­тан «Молдабайдың әнін» әуелетсе, министр де қолына домбыра алып, балалармен бірге «Ана туралы» әнді шырқады.

Еске сала кетейік, құқық пен тәртіп, ақпарат, спорт және саламатты өмір салты, өзін-өзі тану және бақыт (психология), қам­қорлық (еріктілер), мәдениет және өнер (музыкалық, көркем шығар­машылық), пікірталас қозға­лысы, экология және еңбек сынды 8 фракциядан тұратын мектеп парламенті – оқушылардың білім беру ұйымының өзін-өзі басқаруына, оқу-тәрбие үдерісін ұйымдастыру кезінде туындаған мәселелерді шешуге мүмкіндік береді. Облыс бойынша 34 мың оқушы қамтылған 434 мектеп парламенті жұмыс істейді.

Сапарда Ғани Бейсембаев өңір тұрғындарымен, ұстаздармен де кездесті. Облыстық білім бас­қармасының басшысы Салтанат Беспаева баяндама жасап, білім саласының дамуына жан-жақты қолдау барын атады. Биыл білім саласының бюджеті 323,1 млрд теңгені құрап, өткен жылмен салыстырғанда 42,5 млрд теңгеге артып отырғанын мысал етті. Сонымен қатар негізгі баяндамашы өңірдегі үш ауысымды мектептер мәселесін жою жолындағы жоспарларды тарқатты. «Мемлекет бас­шысының бастамасымен қа­­был­данған «Жайлы мектеп» ұлт­тық жобасы аясында 53 мектеп салу жоспарланған. Биыл 26 мектептің құрылысы бас­талды. Алдағы жылы 27 мек­теп­тің іргесі қаланады. Осы­лай­ша, өңірде үш ауысымды оқы­ту мен оқушы орнының тап­шы­­­­лы­­ғын толық шешу көз­де­­ліп отыр», деді басқарма бас­шысы.

Басқосуда облыстық бі­лім саласының ардагерлері мен кол­ледж, депар­тамент басшы­ла­ры­ның ұсыныс-тілектері тың­дал­ды. Кездесу барысында министр сапалы білім беру мен тәр­­­бие­нің тізгінін тең ұстау қа­жет­тігіне назар аударт­ты. Оған өңір­дің ақсақалдар алқасы­ның қо­сар үлесі зор болмақ. Сондай-ақ педагогтердің кәсіби дамуы және білікті­лік тестілеуін өткізу ережелері сөз болды.

– Мемлекет басшысының ті­келей қолдауымен 2019 жы­лы пе­дагог маман­дығының мәр­те­бесі бекітілді. Мұғалім­дер­дің жа­­ла­қысы көтеріліп, жұмыс жағ­дайы жақсарды. Артық функ­циялар­дан босатылып, кәсіби даму мүмкіндіктері қарасты­рылды. Министрлік аттестаттау жүйесін жетілдіріп жатыр. Біз білім беру жүйесін үздіксіз дамыту үшін бар жағдайды жасауымыз керек. Әр мұғалімнің еңбегі оқушының жетістіктерімен бағалануы керек деп есептейміз. Ол үшін Ұлт­тық платформа базасында мұға­лімдерді аттестаттау үдерісін автоматтандыру жұмыстары жүргізіліп жатыр. Ол объективті және ашық болуға тиіс, – деді Ғ.Бейсембаев.

Айта кетейік, Алматы облы­сында 33 мыңға жуық педагог жұмыс істейді.

Министр бұған дейін бұқара­лық ақпарат құралдарында тал­қыланған резонанстық мәселе­лерге тоқталып, ондай фактілерге жол бермей, облыстың барлық ауданында ақпараттық-түсіндіру жұмыстарын күшейту жөнінде тапсырма берді. Сонымен қа­тар қыркүйек айынан бастап ми­нистрлік 2023-2025 жылдарға ар­налған Біртұтас тәрбие бағдар­ламасын қабылдағандығын еске салып, оның ерекшеліктеріне тоқ­талды. Сапар соңында сала басшысы өскелең ұрпақтың білімі мен тәлім-тәрбиесіне жауап­ты ұстаздарға зор сенім артып, еңбектеріне сәттілік тіледі.

Алматы облысы