Астанада Үндістан мен Орталық Азия мемлекеттерінің ұлттық қауіпсіздік жөніндегі кеңесшілері мен Қауіпсіздік кеңесі хатшыларының екінші кездесуі өтті. Жиынға еліміз атынан Қауіпсіздік Кеңесінің хатшысы Ғизат Нұрдәулетов қатысты.
Іс-шарада сөйлеген сөзінде Ғ.Нұрдәулетов қатысушыларға Мемлекет басшысы Қасым-Жомарт Тоқаевтың құттықтаухатын оқып берді. Онда «Орталық Азия – Үндістан» мемлекеттерінің басшылары қатысқан бірінші саммитте өңірлік қауіпсіздікті нығайту өзара іс-қимылдың басты басымдықтарының бірі ретінде белгіленгені айтылған.
«Елдеріміздің Қауіпсіздік кеңесі хатшыларының, ұлттық қауіпсіздік жөніндегі кеңесшілерінің екінші кездесуі осынау өзекті міндетті жүзеге асыруға маңызды үлес қосады. Қазақстан Шанхай ынтымақтастық ұйымы саммитінде әділетті әлем мен келісімге қол жеткізу жолында әлемдік бірлік туралы бастама көтерді. Онда ұсынылған қауіпсіздіктің жаңа парадигмасы жаһандық оңтүстік пен жаһандық солтүстік арасындағы ашық диалог ұстанымдарына негізделген. Өңірлік деңгейдегі ынтымақтастығымыз бүкіл Еуразия кеңістігіндегі өзара іс-қимылды дамытуға септігін тигізеріне сенімдімін. Мемлекеттеріміздің алдында ортақ күш-жігерді талап ететін бірқатар жалпы өзекті сын-тегеурін тұр. Оның қатарында халықаралық терроризм, экстремизм, есірткі тасымалы және трансұлттық қылмыс бар», делінген Президенттің құттықтаухатында.
Мемлекет басшысы жиынға қатысушыларға жолдаған үндеуінде тәуекелдердің басым бөлігі Ауғанстандағы әскери-саяси және әлеуметтік-экономикалық ахуалға байланысты екеніне назар аударады. Орталық Азиядағы мемлекеттер мен Үндістан азық-түлік қауіпсіздігін нығайтуға бірлесе күш салуға тиіс.
«Қазақстан АӨК өнімдерін жеткізудің өңірлік хабын құру үшін қажетті ресурстар мен инфрақұрылымға ие. Өзге де салалар сияқты бұл бағытты дамыту көлік қауіпсіздігін қамтамасыз етуге тікелей байланысты. Қазірдің өзінде Қазақстан Азия мен Еуропа арасындағы құрлықтағы транзиттік тасымал жүйесінде маңызды буын саналады. Орталық және Оңтүстік Азия өңіріндегі көлік байланысы мәселесін шешу біздің жан-жақты ынтымақтастығымызды сапалы жаңа деңгейге шығаруға қабілетті. Елдеріміз ақпараттық қауіпсіздікке әсер ететін ықтимал және нақты қауіп-қатерлерге тап болып отыр. Сондықтан өзара тәжірибе алмасып, технологияларды үйренудің пайдасы мол болмақ», деді үндеуде Қасым-Жомарт Тоқаев.
Президент үнемі ақпарат пен сараптамалық бағалаулармен, оның ішінде өңірлік қауіпсіздіктің архитектурасына қатысты жаңа әдістермен алмасу маңызына тоқталды.
«Жалпы, өңірдегі тұрақтылық пен қауіпсіздікті қамтамасыз етіп, біз сауда-экономикалық ынтымақтастықтың одан әрі тереңдету және мәдени-гуманитарлық байланыстарды кеңейту үшін мығым іргетас қалаймыз. Осындай форматтағы көпжақты диалог қазіргі заманғы сын-тегеуріндегі үнқату бойынша бірлескен іс-шараларды жүзеге асыру үшін лайықты алаңға айналарына сенімдімін», делінген Мемлекет басшысының құттықтаухатында.
Президенттің сәлемдемесін оқып шыққаннан кейін Ғ.Нұрдәулетов жиынға қатысты өз пікірін білдірді. Оның айтуынша, қауіпсіздік – өзара ынтымақтастықтың басты бағытына айналып отыр.
«Бұл бағыттағы байланыс күшейді. Бірінші кездесуден кейін биылғы наурызда ШЫҰ алаңында кездестік. Жалпы, өңірлік және халықаралық қауіпсіздік саласындағы ахуал диалог дер кезінде, уақтылы басталғанын көрсетеді. Бұл заманауи қауіп-қатерлерге қарсы тұруға күш біріктіруде жақсы мүмкіндік береді», Қауіпсіздік Кеңесінің хатшысы.