Ұлт саулығы ерекше назарда

Биыл медицина саласына жаңа техника сатып алуға жергілікті бюджеттен 4,7 млрд теңге бөлінген. Бұл медициналық жабдықтармен жарақтандыру деңгейін 93,5 пайызға жеткізуге мүмкіндік береді. Өңірде «Ауылдық денсаулық сақтауды жаңғырту» ұлттық жобасы аясында 18 медициналық-санитарлық көмек нысанын салу қарастырылған. Оның үшеуін жыл соңына дейін пайдалануға беру көздел­ген. Ал 15 нысанның құрылысын келесі жылы бастау жоспарланып отыр.

«Жергілікті бюджет есебінен 19 нысанның құрылысын салу жоспарланған еді. Жыл соңына дейін 12 нысанның құрылысы аяқталады. Ал 5 нысанның құрылысы 2024 жылы басталады. Атырау қаласындағы «Өркен» және «Нұрсая» шағын ауданында күніне 250 пациент қабылдайтын 2 емхананың құрылысын жеделдетуге шешім қабылданды. Сол себептен, жергілікті бюджеттен қаражат қарастырылып, құрылыс жұмыстары қолға алынды», дейді С.Шәпкенов.

Сондай нысанның бірі Атырау қала­сындағы «Береке» шағын ауданында ашылды. Облыс әкімінің орынбасары Жасұлан Бисембиевтің айтуынша, дәрігерлік амбулатория мемлекеттік бағдарлама аясында салынған.

«Мемлекеттің ұстанып отырған басым бағытының бірі – халықтың саулығын арттыру, медициналық көмекке қолжетімділікті қамтамасыз ету. Сол себептен, облыс әкімдігі қолданыстағы нысандарды жаңартып, жаңа емдеу орындарын салуға баса назар аударып отыр», деді Ж.Бисембиев.

Атырау қалалық №3 емхананың дирек­торы Айман Өтегенованың мәліметіне сүйен­сек, жаңа амбулаторияның 33 каби­неті заманауи компьютерлік техникамен, интернетпен толық жабдықталған. Дәрі­герлік амбулатория 7 мыңнан аса па­циентті қабылдауға есептелген. Бір ауы­сымда 80 пациент қабылданады. Мұнда жалпы тәжірибелік дәрігерлерге 5 кабинет қарастырылған. Сондай-ақ күндізгі стационар, егу және емдеу, гине­кология, стоматолог, дәрігерге дейін­гі қарау кабинеті, дені сау балалар бөл­ме­сі, 8 кереуетті күндізгі емхана жұмыс істейді.

«Осы кезге дейін Атырау қалалық №3 емхананың дәрігерлері «Береке» шағын ауданының тұрғындарына медициналық қызметті көрсетіп келді. Енді отбасылық-дәрігерлік амбулаторияда қызмет көрсе­ту­ге толық жағдай жасалды», дейді А.Өтегенова.

Облыс әкімінің дерегіне қарағанда, биыл 6 айда 406 шағым түскен. Оның ішінде 74 шағымда көрсетілген жайттың негізді екеніне дәлел тапқан. Ал 73 шағымдағы айтылған деректер ішінара негізді деп саналған. Бірақ 259 шағымның негізсіз екені анықталып отыр. Әкім шағымдарда көрсетілген кемшіліктерді жою, алдын алу мақсатында медициналық-санитарлық көмек қолжетімділігін жақ­сар­ту, медициналық көмек сапасын арттыру шараларын бақылауына алған.

«Өңірдің медицина саласында кадр тапшылығы әлі де бар. Жыл басында 185 маманның жетіспейтіні анықталған еді. Осы кезге дейін 102 маман жұмысқа қабылданып отыр. Биыл жергілікті бюд­жет есебінен 39 медициналық жедел жәрдем көлігі сатып алынды. Жаңа кө­ліктер желтоқсан айында жеткізіледі. Қыр­күйек айына дейін сақтандырылмаған адамдар саны – 74 876. Бұл көрсеткіш өт­кен жылмен салыстырғанда 17,6%-ға тө­мендеді. Республикалық бюджеттен амбула­торлық дәрі-дәрмекпен қамтама­сыз ету үшін 5,6 млрд теңге бөлініп, дәрі-дәрмекпен қамтамасыз етіліп отыр. Жер­гілікті бюджеттен 301 млн теңге қа­ра­лып, дәрілік заттармен 108 науқас қам­тамасыз етілді», деп мәлімдеді С.Шәпкенов.

Атырау облыстық балалар аурухана­сы­ның директоры Нұрқабыл Айтмұ­хам­бетовтің айтуынша, жақында көпфунк­ционалды 115 кереует сатып алынған. Оған жергілікті бюджеттен бөлінген 127 млн теңге жұмсалған.

«Eleganza моделінен көпфункцио­нал­ды 15, LISA маркалы 100 кереует балалар ауруханасына жеткізілді. Элек­тронды реттегіші бар арнайы төсек нау­қасты стационарлық емдеу мекемелеріне арналған. Кереуетке интуитивті таңба­лары бар басқару блогі орнатылған. Бұл мейірбикелердің пациентке күнделікті күтім жасауын жеңілдетеді. Кереует жеңіл және ыңғайлы, науқас үшін жайлылықты қамтамасыз етеді. Әмбебап кереуеттердің 100-і бөлімдерге бөлінсе, 15-і жансақтау бөліміне орнатылды», деді Н.Айтмұхамбетов.

Бұл ауруханаға 17 млн теңгенің кра­ниотом құрылғысы сыйға берілді. Оны сатып алуға мұнай компаниясы демеушілік көрсеткен. Аурухананың нейрохирург дәрігері Шодер Әріповтің ай­туынша, краниотом – бас сүйекті бұр­ғылау, алынбалы сүйек қақпағын жа­сау үшін қолданылатын әмбебап хирургиялық құрылғы.

«Бұл құрылғының бас және ми жарақатын емдеуге көмегі көп. Мәселен, дәрігердің анықтаған диагнозына бай­ланысты қан ұю мен ісікті жоюға, қан тамырларын қалпына келтіруге болады. Дәрігерлердің түрлі операцияны сәтті жасауы үшін осындай озық құрал-жабдықтар қажет. Әсіресе бас сүйегіне операция жасау кезінде заманауи техно­логияның маңызы ерекше екені байқа­лады. Өйткені нейрохирургияда меди­циналық технологиялар арқылы жоғары нәтижелерге қол жеткізуге болады. Енді қиын операцияларды осы аспаптың көмегімен оңай жасауға мүмкіндік бар. Себебі бұл құрылғы жарақатты азайтады», деді Ш.Әріпов.

Атырау облысы