Темір жолды сайын даланың бүлкілдеп соққан тамыры десек, байтақ елдің тынысы тағы бір рет кеңейді деп айта беруге болады. Алыстағы ағайыны үшін алыс жол жүруді ауыр көрмейтін қазаққа маусым айының 2-сінен бастап № 41-42 Алматы-Атырау бағытындағы жаңа құрамдағы су жаңа жүрдек пойыз қызметіне кірісті.
Жайық бойындағы той жасап жатқан туысқанның шақыртуымен біз де жаңадан тұсауы кесілген пойыздың кезекті бір сапарына куәгер болдық. Вагон ішіне енген сәттен ондағы төсек-орын, үстел, перделердің қолдан жаңа шыққандығы көзге ұрып тұрды. Жолаушылар жайғасқан орындарының “бетін ашу” өздеріне бұйырғанына мәз болғандай, бір-бірлеріне жаңа вагон туралы айтып шүйіркелесіп кетті. Пойыз да орнынан қозғалып, батысты бағыт еткен бойы оңтүстік жерімен жүріп келеді. Кәсібіміз журналист болған соң өзге вагон тұрғындарына да құтты болсын айтайық әрі қуанышын бөлісейік деп біз де вагон аралап келеміз. Айта кететін нәрсе, жолаушыларды оңтүстіктің шұжық шыжғыртуға күші жететін ыстығынан вагон ішіндегі ауа тазартқыш әрі желдеткіш құрылғы құтқарып отырды. Әдетте, қолындағы орамалымен бетін желпіп отыратын жолаушылар қосымша жұмыстан құтылғанына риза болысты.
Жаңа пойыздың мән-жайымен танысу мақсатында пойыз бастығы Асанхан Біләловпен тілдескен едік. Ол былай деді: “Он сегіз жылдан бері осы салада қызмет етіп келемін. Зауыттан шығып ел игілігіне айналып үлгерген пойыздың ноқта ағасы болғаныма қуаныштымын. Бұл пойыз жолаушылар тасқынының артуына байланысты бұрынғы пойызға қосымша күш ретінде жолға шығарылып отыр. Бұған “Оңтүстік” аймақтық филиалының директоры Асқар Шүкірбаевтың еңбегі сіңді деп айтуға толық негіз бар. Сол азамат келгелі ұжымның жұмысы алға жылжып, қызметкерлердің жағдайы жақсарды. Ал өзім басқаратын пойыз туралы айтсам, әр вагонда екі жолсерік қызмет істейді. Барлығы – 14 вагон. Оның 4-уі плацкарт, 4-уі екі орындықты жұмсақ вагон, 6-уы купелі вагон. Бұрынғы пойызда тек арнайы вагондарға ғана желдеткіш орнатылса, қазір ол құрылғы біздің пойыздың барлық вагонында бар. Жолаушыларға қант-шай үлестіріледі. Гигиеналық тазалыққа аса мұқият қараймыз. Вагонда ыстық су да, суық су да бар. Сонымен қоса, ресторандық қызмет көрсету орталығы жұмыс істейді”.
Вагонымызға қайта келіп жайғасардың алдында жолсерікпен әңгіме жүргізуді жөн көрдік. Жасы отыздар шамасындағы жігіт жалақысына көңілі толатынын баса айтты. Су жаңа формасы бойына жарасқан азамат “тек әйеліңнің қасыңда болмайтыны қиындау, қалғанының бәрі жақсы”, деп әзілдеп қойды. Пойыз ақырғы аялдамасына екі түнді ортаға салып кешкі 23.30-да Атырау қаласына тоқтады. Енді жаңа пойызды кері жол күтіп тұр.
Бейбіт АЯТ, журналист.
АЛМАТЫ-АТЫРАУ.