Атырау облысының Исатай және Қызылқоға аудандарында қанатқақты режімде сайлау өтті. Екі ауданның 34 сайлау учаскесінде тіркелген электораттың 56 пайызы дауыс берді. Қызылқоға ауданы барынша белсенділік танытты. Сайлауға 57,2 пайыз халық қатысты.
Атырау облысында вахталық режімдегі өндіріс орындарында жұмыс істейтін адамдар бар. Сайлау кезінде олардың дауыс беруіне жан-жақты жағдай жасалды. Сөйтіп, Исатай ауданында – 480, Қызылқоға ауданында 66 вахталық әдіспен еңбек ететін электорат саяси бәсекеге өз үлестерін қосты. Сонымен қатар мүмкіндігі шектеулі жандардың да жағдайы ескерілді. Оларға арнайы кабиналар, брайл қарпіндегі бюллетендер, аудиожазбалар, сурдоаудармашылар, ұлғайтқыштар, арнайы компьютерлер қойылды. Сондай-ақ қариялар, мүмкіндігі шектеулі жандардың өтінішімен үй-жайдан тыс дауыс жинау жүргізілді.
Өңірлердің сайлау учаскесінде 269 байқаушы дауыс беру барысын байқап отырды. Олар сайлау үдерісінің ашық, заңға сәйкес өтуін қадағалады. Исатайда – 127, Қызылқоға ауданында 142 байқаушы болды. Жалпы алғанда, орта есеппен әрбір учаскеге 8 байқаушыдан қатысты.
Сайлау заң талаптарына сәйкес өтті. Заң бұзушылық тіркелген жоқ. Арыз-шағым түспеді. Дауыс беру нәтижесіне сәйкес Исатай ауданы әкімі болып Нұрым Мусин есімді азамат сайланды. Ол Исатай аудандық мәслихатының төрағасы қызметін атқарған. Ал Қызылқоға ауданының әкімі лауазымы халықтың таңдауы Қанат Қадыржанұлына түсті.
Жалпы, бұл доданың маңызы зор. Біріншіден, өңірлердің орталықсыздандыру мәселесіне қатысты. Тұрғындардың өздеріне таңдау жасауына үлкен мүмкіндік туды. Екіншіден, Президенттің реформасына сәйкес бұл жергілікті жердегі сайлау жүйесіне тың серпін берді. Халық өзі сенген адамды таңдады.
Азамат АЙМАНАКУМОВ,
Атырау облыстық аумақтық сайлау комиссиясының төрағасы