Кеше Премьер-Министр Кәрім Мәсімов облысқа жұмыс сапарымен келді. Үкімет басшысы бұл сапарында ел дамуына арналған индустриялық-инновациялық бағдарламалар шеңберінде аймақта жүзеге асырылатын бірнеше жобамен таныспақ.
Премьер-Министр ең алдымен “Батыс Еуропа - Батыс Қытай” халықаралық автомагистралінің құрылысында болды. Мұндағы жұмыс қазір екі ауысымда, яғни қарқынды жүргізіліп жатыр. Көлденеңінен килігіп, іске кедергі келтіріп тұрған ешқандай түйінді мәселе жоқ. Автомагистральдің облыстан өтетін шақырымдарын тендер бойынша жеңіп алған “Ақмола құрылыс материалдары”, “КСС ЕgC/Жамбылжолқұрылыс” және “Казахдорсторй” ЖШС-лар сияқты компаниялар өздеріне міндеттелген тапсырмаларды абыроймен орындап келеді. Жұмыс кестесінен ауытқушылық жоқ. Құрылыс материалдары мен техника жеткілікті. Адам күші мол. Мысалы, тек қана “КСС ЕgC/Жамбылжолқұрылыс” пен “Казахдорстрой” ЖШС-ларында тиісінше 737 және 1379 адам жұмыс істейді.
Маңызды құрылыстың кедергісіз жүргізілуіне облыс әкімі Қ.Бозымбаев та көп көңіл бөліп, қажетті көмек көрсетіп отыр. Битумға деген сұранысты Қызылорда зауыты орындайтын болды. Ал цемент Өскеменнен алынбақ. Оған дейін Жамбыл өңіріндегі цемент зауыттары да іске қосылмақшы.
“Батыс Еуропа - Батыс Қытай” халықаралық автомагистралінің құрылысындағы осындай жақсы істермен танысқаннан кейін Премьер-Министр қазақ-қырғыз шекарасындағы “Айша бибі” кеден бекетіне келді.
Қазақ елі қашаннан үйін таспен емес, доспен қоршаған ел ретінде белгілі. Бұл абзал ойдың басында Елбасы Нұрсұлтан Назарбаевтың өміршең саясаты тұрғаны белгілі. Жамбыл облысындағы кеден органдары бүгінде Қазақстан-Қырғыз елдері аумағындағы республикалық және халықаралық дәрежедегі 10 автожолды, көп жақты байланысқа арналған 4 автожолды және екі жақты байланыстағы 6 автожолды бақылауда. Кеден қызметінің кедендік бақылауды жүргізуге лайықты ғимараттар мен шекара шебінде бекеттер, бақылау-өткізу пункттері ашылып, олар мультимедиялық құралдармен, заманауи техникалармен жабдықталғаны көзге көрініп тұр. Шынында “Айша бибі” кеден бекеті мен көрші қырғыз елінің кеденін салыстыра қараған адамға кімнің кім екені анық байқалады.
Бұрнағы жылы Жамбыл облысы бойынша кедендік бақылау департаменті ел қазынасына 18 миллиард теңге өндірсе, ағымдағы жылдың өткен 5 айы ішінде 3,5 миллиард теңге өндірді. 2010 жылы жеңілдетілген тәртіп бойынша өндірілген кедендік төлемдер мен салықтар екі есеге артып, жалпы сомасы 59 миллион 41 мың теңгені құрады.
Премьер-Министр К. Мәсімов кеден бекетіндегі барлық игілікті істермен және жаңа техникалармен танысты. Шекара қызметінің арнайы үйретілген иттерінің арнайы қойылған сөмкелер мен шабадандардың ішінен “жарылғыш затты” тауып алуы жиналғандарды тәнті етті. Ал бұл кеденшілер үшін үйреншікті іс.
Қырғыз еліндегі уақытша үкіметтің өтініші бойынша екі ел арасында әзірге 3 кеден бекетінің ашылғаны белгілі. Егер көрші елде жағдай жақсарса, бақылауда ұстауға болатын басқа кеден бекеттері де ашылуы мүмкін. Одан кейін қырғыз елінің уақытша үкіметі алдағы уақытта Кеден одағына кіруге мүдделі екендіктерін жеткізіпті. Ол енді алдағы уақыттың еншісі.
Премьер-Министрдің жұмыс сапары бүгін одан әрі жалғасады.
Көсемәлі СӘТТІБАЙҰЛЫ, Жамбыл облысы.