Қақтығыс аймағындағы отандастарымыз елге оралды

Әуежайдағы барлық мін­детті рәсімнен өткеннен кейін аза­­маттарға уақытша бас­пана бе­ріліп, оларға қажетті құ­қық­­тық, медициналық және өзге де көмек көрсетілді. Аса ауыр міндетті Қазақстанның Из­раильдегі, Иор­даниядағы және Мысырдағы елшіліктері абы­роймен орындап, аталған мем­лекеттердегі уәкілетті органда­рымен және халықаралық ұйым­дармен бір­лесе үйлесімді жұ­мыс істеді.

Таяу Шығыс өңірінің сыртқы саяси ведомстволарының бас­шы­лығымен келіссөздер қо­рытындысы бойынша СІМ азаматтарымыздың Газа секторынан қауіпсіз және еш ке­дергісіз шығуы туралы уағда­ластыққа қол жеткізді.

Айта кетерлігі, 15 қарашада эвакуацияның бірінші кезеңі жүзеге асырылған-ды. Нәти­же­сін­де, «Рафах» бақылау-өткі­зу пункті арқылы Газа секторынан Мысыр аумағына 92 Қазақстан азаматы мен олардың отбасы мүшелері өтті.

Қазақстан дипломат­тары отан­­дас­тарымызға бар­лық қа­­жетті консулдық-құқық­тық және пси­хологиялық көмек көр­сетті. Шекарадағы рәсімдер­ден кейін азаматтарымыз колонна құ­ра­мында жолға шығып, жа­қын маңдағы Каир қаласына жет­кізілді.

Осы орайда өткен аптада Премьер-министрдің орынбасары – Сыртқы істер министрі Мұрат Нұртілеу Израиль Сырт­қы істер министрі Эли Коэнмен телефон арқылы сөйлесіп, эва­куа­циялау мәселесін талқылаған-тұғын.

Сұхбат барысында тарап­тар сауда-экономикалық, ин­вес­тициялық және мәдени-гу­ма­нитарлық салалардағы екі­жақты қарым-қатынастардың үде­мелі сипатын атап өтті. Из­раиль Сыртқы істер ми­нистрі Таяу Шығыстағы Израиль мен палес­тиналық ХАМАС қозға­лысы арасындағы қақтығыс аясын­дағы қазіргі жағдаймен таныстырды.

М.Нұртілеу қақтығыстың шиеленісуіне және әскери іс-қимыл аймағындағы жағдайдың өршуіне алаңдаушылық білдірді. СІМ басшысы қазіргі қақтығысқа қатысты Қазақстанның ұстаны­мын жеткізді. Министр қақты­ғысушы тараптарды Таяу Шы­ғыста бейбітшілік пен тұрақ­тылықтың жолдарын іздеу­ге шақырды. Бұл мәселенің бүкіл әлем қауымдастығы үшін жаһандық маңызы бар екеніне назар аударды.

Осы тұрғыда Қазақстан дипломаты Президент Қасым-Жомарт Тоқаевтың ТМД Сам­ми­тіндегі мәлімдемесін атап өтіп, жағдайдың шиеленісуі Таяу Шығыста ғана емес, жалпы әлемде ауыр зардаптарға әке­луі мүмкін екенін баса айтты. Осыған байланысты Қазақ­стан Израиль-Палестина шие­ленісін бейбіт келіссөздер мен дипломатиялық диалог арқылы шешуге бейілді.

М.Нұртілеу израильдік әріп­тесіне Газа секторындағы Қа­зақстан азаматтарын эвакуа­ция­лауға жәрдемдесу туралы өтініш білдіріп, бұл мін­деттің еліміз үшін бірін­ші ке­зектегі басымдық еке­нін атап өтті. Ол сондай-ақ Э.Коэнді қа­зақ­стандықтардың Отаны­мыз­ға тезірек оралуы бойынша Мы­сыр билігімен жүр­гізіліп жат­қан жұмыс барысы туралы хабар­дар етті. Министр Э.Коэн беріл­ген ақпарат үшін әріп­тесіне алғыс айтып, Израиль тарапы Қазақстан азаматтарын эвакуациялау мәселесін шешуге бар күш-жігерін салатынын және бұл мәселені өзінің жеке бақылауына алатынын жеткізді.

Қазақстандық дипломаттар қақтығыс аймағында қалып қой­ған Қазақстан азаматтары­на көмек көрсету және эва­куациялық іс-шараларды ұйым­дастыру жөніндегі жұмыс­ты жалғастырады.