Италия Дэвис кубогін иеленді

Ширек финалда Финляндия мен Канада, Аустралия мен Чехия және Италия мен Нидерланд құрамалары біраз тіресті. Десек те шешуші тұста ширақ қимылдаған алғашқылары жеңіске жетті. Осы кездесулердің үшеуінде де 2:1 есебі тіркелді. Сербияға Ұлы­бри­танияны ұту еш қиындық туғыз­ған жоқ. Олар барлық мәселені екі сетте шешті – 2:0.

Жартылай финалда аустралия­лықтар Суоми елі өкілерін сүрін­дірді – 2:0. Ал италиялықтар мен сербиялықтар арасындағы са­йыс шиеленіске толы болды. Ал­ғашында Миомир Кецманович Ло­ренцо Музеттиді қапы қалдырып, өз комадасын алға шығарды. Ке­лесі кездесу қос мемлекеттің мақт­анышы Новак Джокович пен Ян­ник Синнер арасында өтті. Осы бәсекенің фавориті Сербияның саңлағы екені сөзсіз. Ол – бүгінгі таңдағы дүние жүзінің бірінші ракеткасы және әлемдік теннис тарихында ең көп олжаға кенел­ген ойын­шы. Осы жағынан Джоковичтің алдына түсетін еш­кім жоқ. Бірақ АТР тізімінде төртін­ші орында тұрған Синнерге бұл жағдай еш әсер еткен жоқ. 22 жастағы жалынды жас сын сағатта 36 жас­тағы даңқы жер жарған дүл­дүлді сүріндірді. Есеп – 6:2, 2:6, 7:5.

Финалда Италия мен Аус­тралия жолықты. Тұсаукесер кез­­десуде Маттео Арнальди (Ита­лия) Алексей Попыринды (Аустра­лия) тізе бүктірді. Одан кейін түрлі себептерге байланысты Мэт­тью Эбден/Макс Перселл мен Си­моне Ботелли/Лоренцо Сонего ара­сындағы жұптық сайыс өтпей қалды. Шешуші тұста Янник Син­нер Алекс де Минорды 6:3, 6:0 есебімен ұтып, Апеннин түбегі жан­күйерлеріне шатттыққа бөледі.

Сөйтіп, Италия құрамасы өз тарихында Дэвис кубогін екінші мәрте олжалады. Бірінші рет олар 1976 жылы Чилидің астанасы Сантьягода өткен финалдық ойында жарыс қожайындарын 4:1 есебімен ойсырата ұтып, бас жүл­дені төбелеріне көтерді. Сол жұлдызды команданың сапында Коррадо Барадзутти, Паоло Бер­толуччи, Антонио Дзугарелли және Адриано Паннатта сынды серкелер өнер көрсетті. Содан бері 47 жыл да зымырап өте шықты. Міне, енді Янник Синнер бастаған сайыпқырандар биыл толағай табысқа қол жеткізіп отыр. Сондай-ақ олардың 1960, 1961, 1977, 1979, 1980, 1998 жылдары жалауы желбіреген жарыстардың финалында ойнағанын да айта кеткен абзал.

Кезінде Қазақстанның тен­нис­шілері де Дэвис кубогінде жақсы өнер көрсеткен еді. Біздің жігіттер 2011, 2013, 2014, 2015, 2018 және 2021 жылдары аталған жарыстың Әлемдік тобының ширек финалында алты рет күш сынасты. Одан зор биікке көтеріле алмағанымызбен, осы межеге же­туіміздің өзі орасан зор табыс ретінде бағаланды. Өйткені Қа­зақстан құрамасы сапында атағы алысқа жайылған ойыншылар жоқтың қасы еді. Бірде-бір отан­дасымыз еш уақытта, тіптен, ТОП-30 теннисшінің қатарына да қосылмаған. Соған қарамастан шешуші тұста бір жұдырық болып жұмылып, талай маңызды матч­тарда азулы қарсыластардың аузын ұрып кеттік. Өкінішке қа­рай, кейінгі кездері жолымыз бол­май жүр. Былтыр Испанияның Вален­сиясында ұйымдастырылған ірік­теу турнирінде АҚШ пен Ұлы­британияға жол берсек, биыл Ла-Серенада Чилиге есе жібердік. Осы­лайша, соңғы екі бірдей дүбір­лі додадан шет қалдық. Бұйырт­са, келесі маусымда сол олқы­лықтың орны толып, отандық тен­нисшілеріміз зор табысымен өз жанкүйерлерін қуантады деп үміттенеміз.