Жамбыл облысы, Шу ауданынындағы Балалар мен жасөспірімдер өлкетану және туризм орталығының бухгалтері қызметкерлерге 3 жыл бойы қаражатты аванс түрінде заңсыз аударып келген, деп хабарлайды Egemen.kz облыстық прокуратураның баспасөз қызметіне сілтеме жасап.
«Бухгалтердің қылмыстық әрекетін Шу ауданының прокурорлары анықтап, 2023 жылғы 1 тамызда ҚК-нің 189-бабы 3-бөлігі 1-тармағымен сотқа дейінгі тергеп-тексеру тіркеді (ірі мөлшердегі кiнәлiге сенiп тапсырылған бөтен мүлiктi иемденiп алу немесе талан-таражға салу). Тергеу Жамбыл облысы Экономикалық тергеп-тексеру департаментіне тапсырылды. Мемлекетке келтірілген залал 9,9 млн теңгеден асты, ол тергеу барысында өтелді», делінген ақпаратта.
Шу аудандық сотының үкімімен орталықтың есепшісіне 5 жылға дейін бухгалтерлік қызметпен айналысуға тыйым салынып, 4 жылға бас бостандығын шектеу жөнінде шартты жаза тағайындалды. Үкім заңды күшіне енген жоқ.