Екібастұздық мүсінші, мұғалім, Еуразия дизайнерлер одағының мүшесі Баян Қайнышева Г.Потанин атындағы өңірлік тарихи өлкетану музейінде тұңғыш рет жеке көрмесін өткізді. «Өнеріммен ұштасқан өмірім» атты көрмеге шебердің 60-тан аса туындысы қойылды.
Баян Құрманқызы – он саусағынан өнер тамған шебер. Ол тек мүсіндеу ғана емес, тоқыма, тігіншілік, киіз басу, сәндік қолданбалы өнер түрлеріне ден қойған. Екібастұздағы Абай мен Мұхтардың, Естай мен Сұлтанмахмұт ақындардың, Баянауылда Жүсіпбектің, Ерейментауда Үмбетей жыраудың мүсіндерін жасаған. Бесаспап жанның алғашқы туындысы – әкесінің шағын мүсіні.
– Туындыларымның ішінде ең ұнайтыны – анамның мүсіні. Анам мен ұлымның мүсінін бірге жасап едім, Астанадағы көрмеге қатысқанда келушілердің бірі аттай қалап алып кетті. Ал бүгінгі көрмеге әйгілі жерлестеріміз Мәшһүр Жүсіптің, Қаныш Сәтбаев пен Естайдың мүсіндерін, түрлі жанрдағы кескіндер мен сәндік қолданбалы өнер туындыларын, жүннен, киізден басылған композицияларды әкеліп отырмын. Бюст-ескерткіштерді негізінен гипстен, күйдірілген саздан жасаймын. Байқағандарыңыздай, көбіне қазақ қарияларының, ұлттық дәстүрімізге, болмысымызға сай кескін-келбеттерді сомдауға тырысамын, – дейді шебер.
Бір қызығы, Баян Құрманқызының өнер саласы бойынша арнайы мамандығы жоқ. Кезінде тек тігіншілік кәсіпті меңгеріпті. Кейін педагогикалық училище мен жергілікті университетте білім алған. Бүгінде кеншілер қаласындағы №22 гимназия мектебінде көркем еңбектен шәкірт тәрбиелеп жүргенін жеткізді.
Қазақстан Суретшілер одағы өңірлік филиалының төрағасы Өсербай Шұранов атап өткендей, Баян Құрманқызының туындылары шынайы өмірді бейнелейді. Адамның бет-пішінін, мінезін жоғары деңгейде беру, сыртқы харизмасын сақтап қалу – екінің бірінің қолынан келе бермейтін шеберлік. Жүзден аса туындының авторы соңғы уақытта киіз басу, жүннен бұйымдар жасауға әбден машықтанып алғанын байқатып отыр. Ал тұтастай алғанда, шебердің туындыларынан адал махаббаттың, сыйластық пен сүйіспеншіліктің лебі еседі.
ПАВЛОДАР