Жүлденің ауылы алыстап барады

Туризм және спорт министрлігі Спортты дамыту дирекциясының баспасөз қызметі хабарлағандай, жетінші жарыс күні алдымен конькимен жүгіруден масс-стартта Алина Шүмекова ірік­теуден 3-сатыдан көрініп, жүлдеге таласуға мүмкіндік алған. Алайда финалдық сында құлап, жүлдеден қағылды. Ал Кристина Шүмекова 5:58.38 секунд нә­тижесімен 12-орын­ға тұрақтады. Алтын ме­даль – Ан­гел Да­леманның еншісінде. Бұл – Ни­дерланд атлетінің осы ойын­дар­дағы үшінші алтыны. Күміс тағы да бір Нидер­ланд спортшысы Жасмин Винхуистаға бұ­йыр­ды. Үздік үштікті Юнжи Луи (Қытай) қоры­тындылады.

Ерлер арасында Михаил Мат­рюхин финалға шыға алмады. Руслан Жанәділов (5:31.80) 11-сатыда қалды. Финн Сонне­калб (Германия) Канвонда осымен үшінші рет чемпион атанса, Қытай өкілі Баошуо Пан – күміс, Эйрик Андерсен (Норвегия) қола медальге ие болды.

Фристайл-могулдан Денис Рас­труба/Юлия Феклистова жұбы алысқа бара алмады. Олар жұп­тық сында 1/8 кезеңде Фран­цияға есе жіберді (20:50). Ал 28 қаңтар күні таңертең фрис­тайл-могул бәсекесінде қос атле­тіміз үз­дік ондыққа кірді. Параллель сайы­сында Юлия Фек­листова 10 балл жинап, 9-сатыға жайғасса, Денис Раструба 10-орынға табан тіреді. Қыздар арасында Элизабет Лемли (АҚШ) топ жарды. Лотти Лодж (Канада) – кү­міс, Эбби МакЛарнон (АҚШ) қола ме­даль­­ді мойнына тақты. Ерлер арасында Оң­түс­тік Корея өкілі Син Юнг Ли чемпион атан­­са, Портер Хафф (АҚШ) – екінші, Та­кута Накамура (Жапония) үшінші орынға тұрақ­­тады.

Ал кешкі сессияда еліміздің кёрлинг ше­бер­лері алғашқы ойынын өткізді. Қазақстан намысын қорғаған ағайынды Мерей және Ибрагим Тастемір (суретте) жұбы Аустрия құрамасындағы ЭммаМюллер мен Луис Хайнхичке 4:5 есебімен жеңіліп қалды. Кеше Мерей мен Ибрагим Германиядан келген құрдас­тарымен күш сынасты.

Бүгінде 1 алтын, 2 қола медаль еншілеген Қазақстан бейресми жалпы есепте 15-сатыда тұр. Елімізге алғашқы алтынды Илья Мизерных сыйласа, Полина Омельчук (шорт-трек) пен хоккейден ұлттық құрама қола медаль жеңіп алды.

Жасөспірімдер олимпиадасы 2 ақпанда мәресіне жетеді.