Қарағанды облысындағы Ақтоғай ауданы прокуратурасының наразылығы бойынша ауданның Экономика және қаржы бөлімінің жалпы сомасы 328 миллион теңгені құрайтын ашық конкурсы өткен жоқ.
Конкурс талаптарында айтылғандай, бұл қаржы «Ақжарық – Аппаз» тасжолын ағымдағы жөндеуге арналған. Алайда шын мәнінде бұл учаскеде жергілікті және облыстық деңгейдегі уәкілетті органдардың балансында ешқандай жол жоқ екені анықталып отыр.
«Автомобиль жолдары туралы» заңның 1-бабына сәйкес ағымдағы жөндеу – жолдағы төтенше жағдайлардың, ақаулардың алдын алу мақсатында жүргізілетін жұмыстар кешені, яғни ол қолданыстағы жолдарға жүргізілуге тиіс. Ал аталған экономика бөлімі осы норманы бұза отырып, құрылыс жобасы жоқ жаңа тасжол салуға әрекеттенген.
Сонымен қатар құрылыс-монтаж жұмыстары бойынша мемлекеттік сатып алулар Қаржы министрінің 2022 жылғы 18 қаңтардағы №46 бұйрығымен бекітілген «Рейтингтік-балдық жүйені пайдалана отырып, конкурс арқылы жүзеге асырылатын тауарлардың, жұмыстардың, қызметтердің тізбесіне» енгізілген.
Ақтоғай ауданы прокуратурасының қадағалау актісі бойынша бұл конкурс жойылды.