Ел астанасында белгілі театр режиссері, Қазақстанның еңбек сіңірген өнер қайраткері Болат Атабаев туралы түсірілген «Мың жылдық ойын» деректі фильмінің тұсаукесері өтті. Авторы – журналист-жазушы Қанат Тілеухан.
Автордың айтуынша, фильмді түсіру 2021 жылы, режиссердің 70 жылдығына орай жоспарланған. Туындының түсірілуіне тележурналист, Мәжіліс депутаты Мақсат Толықбайдың дәнекер болуымен кәсіпкер Махат Төреәлі демеушілік көрсеткен.
«2021 жылы Болат Атабаевтың 70 жылдығы еді. Соған орай түсірсе деген әуелде ой болған. Бірақ оның реті биыл келді. Болат ағамен алғаш телевидениенің жаңалықтар қызметінде жүрген кезде танысып едім. «Қазақ журналистері сиыр сияқты шорылдатып сигендей ғып жазуды қашан қоясыңдар. Проблеманы бірден нақты жазбайсыңдар ма» дейтін. «Мың жылдық ойынды» бітіріп алып, бірнеше рет қарап шықтық. Болат аға өзі көрсе, не болар еді деп ойлап кеттім де шошып кеттім», дейді Қанат Тілеухан.
Фильм саяси ұстанымы үшін елден жырақ кеткен режиссердің жан-дүниесін ашып, көрерменге жақыннан танытты. Көп жерде жарияланбаған Болат Атабаевтың бейнежазбалары, Қанат Тілеуханның одан алған сұхбаттары мен «Король Лир» қойылымы астасып түсірілген. Фильмнің бастапқы атауы «Абайдың досы» деп таңдалған. Алайда театр режиссерінің шәкірті Азамат Шарғынның ұсынысымен «Мың жылдық ойын» болып өзгертіліпті.
«Театрдың мың жылдық ойыны әлі жалғасып жатыр. Авторитарлық жүйенің, диктаторлық биліктің сонау Рим империясынан бергі императорлардың халықпен ойнауына да мың жыл. Осы мың жылдық ойындардың арасында басын тасқа да, тауға да соққан режиссердің бейнесін жасауға мүмкіндігімізше тырыстық. Әрине, Ермек Тұрсынов айтқандай, Болат аға – ең бірінші кезекте суреткер. Бұл – театрдың қарсылығы, театрдың күресі. Өнер арқылы ол кісі өзінің сөзін айтқысы келді. Еркіндік, демократиялық құндылықтарды дәріптегісі келді», дейді фильм авторы.
Фильмді тамашалаған белгілі жазушы-драматург, Абай атындағы Мемлекеттік сыйлықтың лауреаты Роза Мұқанова туынды және оның кейіпкері туралы тебірене келе: «Болат Атабаев шын мәнінде театрдың реформаторы болды», деп атап өтті.
Сондай-ақ біртуар режиссердің өнердегі талабы өмірде де өзекті екені айтылды.
«Болат Атабаевтың мықты режиссерлігі өз алдына, ол осы күнделікті өмірде де әділдік үшін күресіп өткен қайраткер және сол шынайылықты сахнадан да талап ететін», деді Мақсат Толықбай.
Айта кетейік, тұсаукесерге зиялы қауым мен театр жастары, өнер саласында білім алып жатқан студенттер, марқұмның туыстары жиналды.
Талантты режиссер, азаматтық ұстанымы берік ер есімі кейінгі ұрпақ санасында өшпесе керек-ті. Тұлға өмірінен сыр шертетін осындай туындылар да Атабаев есімінің ескірмеуіне үлес қосар.