Екібастұз қаласы маңында ертегілердегідей мұздық пайда болды. Ішінде кәдімгідей үңгірі бар таңғажайып мұз нысаны жақын жердегі су құбырының жарылуынан түзілгені анықталды.
Бұл жайында ең әуелі танымал журналист Асхат Ниязовтың Instagram-дағы парақшасынан көрдік. Техногендік апаттан пайда болған мұздық қалаға қарай өтетін үлкен су магистралі бойында тұр.
«Мұздық Екібастұздағы апаттан соң пайда болған тәрізді. Бұл жерде қаншама су аққанын елестетудің өзі қиын, жарық құбырлардан су әлі де ағып жатыр. Жуық уақытта ол ери бастайды, сондықтан оған жақындау қауіпті болар. Егер оны көрсеңіздер, ішіне кірмеңіздер. Сыртынан қарағанда да ол әдемі» деп жазды ол парақшасында.
Ойда-жоқта елсіз далада пайда болған «таңғажайып композиция» жөнінде Екібастұз қаласы әкімдігінен сұрадық. Белгілі болғандай, ол ауызсу құбыры бойындағы жарықтан аққан судан түзіліпті.
– Лесхоз ауданы маңындағы бұл құбыр «Горводоканал» мекемесінің балансында тұр. Қыста бұл жерде ірі апат орын алып, аяздың салдарынан әлгіндей мұздық пайда болған. Құбырдағы жарық жамалып, қалпына келтірілді. Биыл аумақтағы магистралдық су құбырын реконструкциялау жоспарланған. Алдағы уақытта мұндай залалдар пайда болса, бірден қалпына келтіріледі, – деп хабарлады Екібастұз қалалық әкімдігінің баспасөз қызметі.
Аталған учаскені жөндейтін мердігер қазірден таңдалып қойған, күн жылына іске кіріспек.
Шаһар тұрғындары мен мұздықты көрген адамдар әлгі жерде көп мөлшерде су төгілгені анық деп отыр. Судың үнемсіз жағдайда далаға ағып кеткен шығынын тұтынушылардан өндіріп алмай ма деген күдік те бар жұрттың бойында. Ал сумен қамту мекемесі алдағы уақытта тарифте ешқандай өзгеріс болмайды деп сендіріп отыр.
2022 жылдың қараша айында қаланың жылу жүйесінде кешенді апат болғанда мұндай мұздықтар қаланың әр жерінде пайда болған еді.
Павлодар облысы,
Екібастұз қаласы