Оңтүстік Кореяның Пусан қаласындағы үстел теннисінен өтіп жатқан командалық әлем чемпионатын Қазақстанның ұлттық құрамасы жеңіспен бастады.
Жігіттер тұсаукесер кездесуде Сауд Арабиясымен сайысқа түсті. Кирилл Герасименко Халид Альшарефті және Алан Құрманғалиев Абдулазиз Шулайбиді 3:0 есебімен бас көтертпей ұтса, сол елдің ең үздік ойыншысы Әли Әлхадравиді жеңу үшін Айдос Кенжеғұловқа біраз тер төгуіне тура келді – 3:2. Қорытынды есеп – 3:0. Бұрымдаларымыз Аустралияға қарсы ойнады. Бұл тартыста таразы басы біразға дейін теңселіп тұрды. Бірінші бәсекеде Зәуреш Ақашева Фан Цзянь Лэйден жеңілсе, Сарвиноз Мірқадырова мен Анастасия Лаврова өз қарсыластарын қапы қалдырып, команданы алға шығарды. Одан кейін Жасыл құрлықтың намысын қорғап жүрген алты бірдей Олимпиадаға қатысқан қытай қызы Сарвинозды сүріндірді. Десек те шешуші ойында Зәуреш тәжірибелі Мишель Бромлиeден басым түсіп, жерлестерімізге жеңіс сыйлады. Есеп – 3:2.