Елдің логистикалық әлеуетін арттыру мәселесі өткір тұр. Бұл орайда «Қазақстан темір жолы» сияқты ұлттық компанияның міндет ауқымын кеңейту аса қажет. Көлік министрі Марат Қарабаевтың айтуынша, ҚТЖ-ны ұлттық транзиттік-логистикалық компанияға айналдыру бойынша атқарылған жұмыстар екі бөліктен тұрады.
«Біріншісі – инфрақұрылым жасау, екіншісі – тасымалдау. Инфрақұрылым жасау бойынша Қытайдың Ляньюнган портында Қазақстан терминалы ашылған. Оның қуаты – 220 мың тонна. Бұдан бөлек, биыл бірінші кезең аясында Сиань портында тағы бір жаңа Қазақстан терминалы ашылды. Оның қуаты – 66 мың тонна. Ляньюнган портымен бірге Қорғаста арнаулы құрғақ жүктерге арналған терминал салынды. Одан кейін Алматыда Сиань портымен бірге құрғақ жүктерге арналған арнайы терминал құрылысын биыл бастаймыз. Сонымен қатар Ляньюнганмен тағы бір жобаны қолға алып, Ақтауда арнаулы терминал саламыз», деді М.Қарабаев Сенатта сөйлеген сөзінде.
Айтуынша, ел ішіндегі жүктерді сыртқа шығару бағытында Әзербайжанның Алят портында «Abu Dhabi Ports» компаниясымен бірге терминал салу келесі жылға жоспарланған. Ал Грузияның Поти қаласында отандық жеке кәсіпкер қуаты 480 мың тонналық терминал салған. Оған ҚТЖ консорциум ретінде кірді. Қытайдан Еуропаға дейін инфрақұрылым салу бағытындағы жоспар және атқарылған жұмыс осы. Яғни Қытай аумағында 1 терминал салынды. Биыл 2 терминал құрылысы басталады. Келесі жылы тағы 2 терминал салу жоспарланған.
Министр жүк тасымалдау бағытына да тоқталып, ҚТЖ-ның сингапурлық «PSA International Pte Ltd» компаниясымен бірлесіп, Транскаспий көлік дәлізі бойынша жүктерді тасымалдайтын бірыңғай компания құрғанын мәлімдеді. Осы компания Еуропа мен Қытай арасында жүктерді тасымалдаумен айналыспақ. Ресейден Иран мен Пәкістанға шығатын жол бойынша «Abu Dhabi Ports» компаниясымен екіжақты келісімшартқа қол қойылып, еншілес компания ашылды. Бірақ жүк тасымалдау әлі басталмаған.
«ҚТЖ» ҰК Басқарма төрағасы Нұрлан Сауранбаев жолаушылар тасымалы және жол сапасына қатысты сауалдарға жауап берді.
«Қазақстанда бүгінде 16 мың км теміржол бар. 2,5 мың км жолдың пайдалану мерзімі өткен. Президент тапсырмасымен 2030 жылға дейін 11 мың км жолға жөндеу жүргізу жоспарланып отыр. Былтыр теміржолдағы жөндеу жұмыстары екі есе көбейді», деді ол.
Өткен жылы локомотивтердің күрт жетіспеу қаупі орын алған. Дегенмен алдын ала тапсырыстың арқасында 119 локомотив сатып алыныпты. Биыл – 194, 2025 жылы 245 локомотив сатып алынбақ. Осылайша, бұл тұрғыдағы қажеттілік толығымен шешілуге тиіс. Спикерлердің мәліметінше, теміржолда жылдан-жылға жүк көлемі де, айналым да артып келеді. Мысалы, былтыр жүк көлемі 297 млн тонна рекордтық көрсеткішке жетсе, жүк айналымы 7 пайызға өскен.