Қазақ Білім академиясының академигі, тарих ғылымдарының докторы, профессор, еліміздегі жоғары мектеп саласының ұйымдастырушысы Амангелді Құсайынов атындағы Еуразия гуманитарлық институтында айтулы тұлғаның құрметіне ғылыми-зерттеу орталығы ашылды. Ашылу салтанаты аясында «Тұлға және ұлт руханияты» атты ғылыми семинар өтті.
Жиын барысында Амангелді Құсайынұлының білім мен ғылымды игерудегі, ұстаздық және ұйымдастырушылық тәжірибесіндегі белестері, отандық тарихымыздағы ғалымның орны жөнінде тұшымды ойлар айтылып, жалпы тұлғаларды дәріптеу, ұрпақ санасына сіңіру ізденістері талқыланды.
Семинар модераторы, тарих ғылымдарының докторы, профессор, аталған оқу орнының проректоры Қадыр Ахметов «Тұлғалардың азаматтық ұстанымдарын зерделеу – жастардың бойына отаншылдықты қалыптастырудың тетігі» екенін айтып, ғылыми-зерттеу орталығының мақсат-міндеттерін таныстырды.
«Қазақ газеттері» серіктестігінің бас директоры, академик Дихан Қамзабекұлы: «Ғалымның мұрасын, еңбек жолын, тән саулығы мен жан саулығына қатысты бастамаларын қоғамға, білім жүйесіне кеңінен насихаттау қажет», – деп, Амангелді Құсайынұлының атқарған еңбегін, адамгершілік қасиетін атап өтті.
Ал институт доценті, тарих ғылымдарының кандидаты Самат Есқалиев ғалымның ел тарихына қатысты ой-толғаныстары мен бірқатар зерттеу еңбектеріне тоқталып, қайырымдылық, көшбасшылық тұжырымдары негізінде жоғары оқу орындарында «Тұлғатану» курсын жүргізудің мән-маңызын байыптады. Сондай-ақ Түркия Республикасы Токат Гази Османпаша университетінің профессоры, «Түркі әлемі» ғылыми-зерттеулер орталығының директоры Омер Фарук Сонмес ұлт руханиятын қалыптастырудағы тұлғалардың рөлін зерделеп, жоғары мектепте түркі елдеріне ортақ тұлғаларды жаңаша оқыту мен дәріптеуді ұсынды.
Жиында Л.Гумилев атындағы Еуразия ұлттық университетінің профессоры Жанат Аймұхамбет, Назарбаев университетінің профессоры Жанар Байтелиева жастардың ұлттық сезімін ояту, төл тарихымыз бен рухани дүниелерімізді ұрпақ санасына сіңіру мақсатында біріккен жобалар әзірлеу туралы пікірлерін ортаға салды.
Институт ректоры, психология ғылымдарының кандидаты, профессор Амангелді Исмайылов тұсауы кесілген ғылыми орталық Амангелді Құсайынұлының ғылымдағы игі жоспарларын жалғастырып, болашақта гуманитарлық ғылымдардың өзекті мәселелеріне арналған зерттеулер жүргізетінін айтып, қатысушыларға алғысын жеткізді.
Ғылыми семинарға елордамыздың бірқатар ғалымдары, қоғам қайраткерлері және жастар қауымы қатысты.
Лаура ДӘУРЕНБЕКОВА,
А.Құсайынов атындағы Еуразия гуманитарлық институтының доценті, филология ғылымдарының кандидаты