Ұлттық қорғаныс университетінде мемлекеттік органдар баспасөз қызметтерінің және бұқаралық ақпарат құралдарының өкілдері қатысқан оқу-әдістемелік семинар өтті.
Әскери журналист қызметінің ерекшелігі және дағдарыс жағдайында коммуникация жасау мәселелері түсіндірілген іс-шарада сарапшылар журналистерге ақпараттық және қарсы насихат жұмысының түрлері, халыққа ақпараттық-психологиялық әсер ету әдістері, қоғамдық-саяси және әлеуметтік-экономикалық салаларда дағдарыстық жағдайлар туындаған кезде әрекет ету алгоритмдері туралы жеткізді. Әскери қақтығыс жағдайындағы журналистердің жұмысына, табиғи және техногендік сипаттағы төтенше жағдайлар қаупі кезінде халықты хабардар ету тәсілдеріне ерекше назар аударылды.
Дәріс курсынан кейін әдістемелік сабақтар өтті. Онда ТЖ режімі, жаппай тәртіпсіздіктер орын алғанда және терроризмге қарсы операция жүргізілетін аймақта журналист жұмысының ерекшеліктері қаралды. Қорғаныс министрінің баспасөз хатшысы, подполковник Руслан Жангулин семинар аясында ақпараттық қауіпсіздік, сондай-ақ ақпараттық қарсы күрес мәселелері маңызды екенін айтты.
– Әскери қақтығыстар туындаған кезде журналистерді сауатты іс-әрекетке дайындау тұрғысынан бізде жақсы тәжірибе жинақталды, – деді ол. – Бірнеше жыл бойы экстремалды журналистикадан әскери дискурстар өткізіп келеміз. Далалық жағдайда журналистер бетпе-бет келуі мүмкін сценарийлерді пысықтадық. Бүгін семинарға қатысушылар әскери қақтығыстар аймағында жұмыс істеу ерекшеліктерімен танысты. Бұдан басқа мемлекеттік органдар баспасөз қызметтерінің өкілдеріне дағдарыс жағдайларында іс-әрекетті үйлестіру жөнінде ұсыныстар берілді.
Қорғаныс ведомствосының өкілі отандық журналистердің әскери саладан жеткілікті деңгейде хабардар болуы керегін атап өтті. Бұл тұрғыда бүгінгі таңда әскери тақырыпқа маманданған тілшілердің құзыреттілігін арттыру, Қарулы күштердің тыныс-тіршілігін, жауынгерлік қызметін неғұрлым кәсіби түрде жариялау үшін жағдай жасау мақсатында түрлі іс-шаралар қолға алынып келеді.
Семинар соңында журналистермен кездескен Қорғаныс министрінің орынбасары Дархан Ахмедиев, Мәдениет және ақпарат вице-министрі Қанат Ысқақов қатысушыларға сертификаттар табыс етті. Дархан Ахмедиев еліміздің Ақпараттық доктринасын іске асыру жөніндегі іс-әрекет жоспарына сәйкес өткізілген семинарда қаралған мәселелердің өзектілігін атады. Мәдениет және ақпарат вице-министрі бұл іс-шараның негізгі мақсаты – баспасөз қызметі, БАҚ және блогерлер қауымдастығы өкілдерінің дағдарыс кезінде, төтенше жағдайлар және әскери қақтығыс жағдайындағы жұмысының ерекшеліктері мен іс-әрекеттері, олардың кәсібилігі мен жұмыс сапасын арттыру, сондай-ақ халықты нақты және уақтылы ақпаратпен қамтамасыз ету екенін жеткізді.