Халықаралық әйелдер күніне орай Астана қаласында ат спортынан қыздар арасында ашық біріншілік өтеді, деп хабарлайды Egemen.kz елорда әкімдігінің баспасөз қызметіне сілтеме жасап.
Елдің түкпір-түкпірінен жиналатын бұрымдылар 8 наурыз күні «Арғымақ» ат-сауықтыру спорт кешенінде кіл мықтыларды анықтайды.
Олар сайыстың 6 бағдары бойынша сынға түседі:
№ 1 маршрут «Ашық класс санаты»; № 2 маршрут «Жастар санаты»; № 3 маршрут «Әуесқойлар санаты»; № 4 маршрут «4 жасар жас жылқылар санаты»; № 5 маршрут «5 жасар жас жылқылар санаты»; № 6 маршрут «6 жасар жас жылқылар санаты».Жарыстың жалпы жүлде қоры – 6 млн теңге.
Іс-шара Астана қаласы әкімдігінің қолдауымен және Астана қаласының Ұлттық және олимпиадалық ат спорты түрлері федерациясының ұйымдастыруымен өтеді.
Жарыс сағат 10:00-де «Арғымақ» ат-сауықтыру спорт кешенінде басталады.