Италияның Бусто-Арсицио қаласында жалауы желбіреген Олимпия ойындарының іріктеу турнирінде екі қазақ боксшысы тұсаукесер кездесулерін өткізді.
57 кг салмақта Махмұд Сабырхан мен эфиопиялық Ядеса Лета күш сынасты. Шымкенттің шымыр жігітінің әлем чемпионы, әлем мен Азия біріншіліктерінің финалисі деген атағы бар. Қарсыласы ондай дәрежеге жетпеген. Сондықтан да Махмұдқа қара құрлық өкілінің «тілін табу» айтарлықтай қиындық туғыза қойған жоқ. Екінші кезеңде қандасымыз Таиландтың саңлағы Саравут Суктхетпен сайысқа түседі. Осы екі боксшы былтыр Бангкокта өткен жастардың құрлық біріншілігінде (U-22) күш сынасқаны есімізде. Ол кезде Сабырхан ұпай санымен жеңіске жеткен еді.
80 кг салмақ дәрежесіндегі Нұрбек Оралбай Гаитидің өкілі Седрик Белони-Дюлиепремен шеберлік байқасты. Бұл бәсекеде төрешілер біздің боксшының мықтылығын бірауыздан мойындады.