Премьер-министр Олжас Бектенов «Kazakh Invest» ҰК» АҚ директорлар кеңесінің отырысын өткізді. Отырыста ұлттық компанияның ағымдағы қызметі мен алдағы жұмыс жоспарлары қаралды.
Қазіргі уақытта «Kazakh Invest» жалпы құны 27,3 млрд долларды құрайтын 200 жобаға қолдау көрсетіп отыр. Аталған іс-шаралар аясында 68,8 мың жұмыс орнын құру көзделген. Биыл шетелдіктердің қатысуымен 40-тан астам жоба іске қосылады деп күтіледі.
Олардың ішінде ең маңыздыларының бірі – Астана қаласында орналасқан америкалық «GE Healthcare» компаниясының медициналық құрал-жабдықтарын шығаратын кәсіпорны. Жоба шеңберінде УДЗ және КТ аппараттарының өндірісі локализацияланады. Бұл отандық ауруханаларды қамтамасыз етіп қана қоймай, болашақта басқа елдерге экспортты жолға қоюға мүмкіндік береді. Сонымен қатар компания республиканың денсаулық сақтау жүйесіндегі кадрлардың біліктілігін арттыруға білім бағдарламаларын ұйымдастыруды жоспарлап отыр.
Сондай-ақ швейцариялық «Roche» компаниясы алдағы уақытта экспортқа шығу перспективасымен Алматыда ісікке қарсы препараттар өндірісін іске қосады.
Аустриялық «Lasselsberger» компаниясы Астанада керамикалық плиткалар, құрғақ құрылыс қоспалары мен құрылыс желімдері өндірісін локализациялап жатыр. Жаңа зауыттың ашылуы 200-ден астам жұмыс орнын құруға мүмкіндік береді және Қазақстан нарығының осы өнімдердегі импортқа тәуелділігін төмендетеді.
Премьер-министрдің тапсырмасы бойынша «Kazakh Invest» алдағы жұмысында астықты терең өңдеу, пластмассаның сұранысқа ие түрлерін өндіру, мұнай-газ жабдықтарын және импорт көлемі жоғары басқа да тауарларды оқшаулау бойынша келешектегі жобаларға инвесторлар тартуға басымдық беретін болады.
«Мемлекет басшысы 2029 жылға қарай экономика көлемін 450 млрд долларға дейін ұлғайту міндетін қойды. Сондықтан ірі инвесторларды іздеу және оларды елімізге тарту бойынша жұмысты күшейту керек. Бұл орайда батыл әрі жаңашыл шешімдер қажет», деп атап өтті Премьер-министр.