Сербияның астанасы Белградта бокстан «Бранко Пешич мемориалының» шымылдығы түрілді. Бұл жарыста еліміздің 12 былғары қолғап шебері бақ сынап жатыр.
Жерлестеріміздің арасындағы ең атақтысы – Санжар Тәшкенбай (51 кг). Ол 2022 жылы Азия чемпионы атанса, 2023 жылы төрткүл дүниенің теңдессізі деп танылды. Сақа спортшылар арасынан ел біріншілігі мен халықаралық турнирлерде сан мәрте жеңіс тұғырына көтерілген Олжас Боқаевты (+92 кг) атап өтуге болады. Өзге салмақ дәрежелерінде Ернұр Қайрат (48 кг), Дәулет Молдашев (54 кг), Оразбек Асылқұлов (57 кг), Бейбарыс Жексен (60 кг), Ерасыл Таңқай (63,5 кг), Сабыржан Ақхалықов (71 кг), Диас Молжігітов (75 кг), Ерасыл Жақпеков (80 кг), Темірлан Мұқатаев (86 кг) және Данияр Рақымбердиев (92 кг) өнер көрсетіп жатыр.
Бірден айта кетейік, қатысушылар санының аздығынан С.Тәшкенбай, Д.Молдашев, О.Боқаев жарысты жартылай финалдан бастаса, Е.Қайрат бірден финалға шықты.