Грузияның астанасы Тбилисиде дзюдодан Grand Slam турнирі аяқталды. Бұл бәсекеде 83 мемлекеттен келген 500-ден аса балуан бақ сынады.
Жарыстың алғашқы күні екі жерлесіміз жеңіс тұғырына көтеріліп, жанкүйерлерін қуантты. Әсіресе 60 кг салмақ дәрежесінде күрескен Нұрқанат Серікбаевтың өнері керемет әсер қалдырды. Алғашқы айналымдарда колумбиялық Йохан Рохас, израильдік Йехонатан Векслер және украиналық Дильшод Халматовты қапы қалдырған ол жартылай финалда әзербайжандық Балабай Агаевтан айласын асырды. Нұрқанаттың барлық бәсекедегі басымдығы төрешілер тарапынан еш күмән туғызған жоқ. Финалда Израильдің тағы бір өкілі Ям Вольчакты тізе бүктірген қандасымыз бас жүлдені қанжығасына байлады.
48 кг салмақтағы Ғалия Тыңбаева (48 кг) ресейлік Алина Сергеева, франциялық Мелани Клемент және бразилиялық Аманда Лимдан басым түсіп, жартылай финалда оңтүстікореялық Хекен Лиге жол берді. Бұл бәсекені тағдырын «шидо» шешті. Үшінші орын үшін тартыста Ғалия испаниялық Мирейя Лапуэрто Комасты қос жауырынымен жерге қадап, қола медальді мойнына ілді.
Жарыстың соңғы күні екі жерлесіміздің жеңіс тұғырына көтерілуге жақсы мүмкіндігі болды. 100 кг салмақта Ислам Бозбаев хорватиялық Златко Кумрич пен франциялық Фрэнцис Дамиерді ұтқанымен, ширек финалда грузиялық Михаил Жапаридзеден жеңілді. Жұбаныш белдесуінде өзбек Ерназар Сәрсенбаевқа сан соқтырған сақа спортшы қола жүлде үшін тартыста аустриялық Лаурин Бёлердің осал тұсын таба алмады.
Бастапқы бәсекелерде франциялық Джозеф Трехек пен өзбек Шохрухжон Бақтияровтан басым түскен аса ауыр салмақтағы Ерасыл Қажыбаевқа одан кейін Грузияның үш бірдей алыбымен айқасуға тура келді. Алғашында ол Ираклий Деметрашвилиден басым түссе, одан кейін даңқты Гурам Тушишвили мен Саба Инанейшвилиге есе жіберіп, бесінші орында қалып қойды.