Күн жылынғалы Абай облысының бірқатар ауданында қарғын су қаупі төніп тұрғаны жасырын емес. Бұған дейін алдын алу жұмыстары жүргізілгенімен, тілсіз жаудың қай тұстан соққы берері белгісіз еді.
Төтенше жағдай департаментінің өкілдері алдын ала тұрғындарға түсіндіру жұмыстарын жүргізіп, өзендер мен бұлақтардың арнасын тазалау керектігін ескерткен. Бородулиха ауданының Красный Яр ауылының іргесіндегі Үбі өзенінде мұз кептелістерінің алдын алу үшін жарылыс жұмыстары да жүргізілді. Семей қаласының ішіндегі қар шығарылып, су басудың алдын алған. Дейтұрғанмен, бірқатар ауданда өзендер арнасынан шығып, жолаушыларға кедергі болған. Әсіресе Аягөз ауданының тұрғындары мен билік өкілдерін әбігерге салды. Аягөз – Бозай тасжолының 20 шақырымында аядай ғана Аягөз өзені арнасынан асып, көпірдің бір қабат төсемін шайып кеткен. Тілсіз жаудың салдарынан Аягөз ауданының әкімдігі жергілікті ауқымдағы төтенше жағдай жариялады. Қазіргі уақытта көпір арқылы көлік қатынасы тоқтатылған. Сонымен қатар басқа айналма көлік жолдары арқылы елді мекенмен байланысты қалпына келтіру жұмыстары жүргізіліп жатыр. Полиция департаментінің қызметкерлері шектеу белгілерін қойып, кезекшілік ұйымдастырды. Ал тұрғындарды Аягөз өзені арқылы өткізу үшін ТЖД қызметкерлері жұмылдырылды. Олар қажет болған жағдайда жүзу құралдарының көмегімен өткелдің қызметін атқарады.
Өзге өңірлермен салыстырғанда, Аягөз ауданына қар жұқа түскенімен қауіп аз емес. Арқаны кеңге салуға болмайтын сияқты. Естеріңізге салсақ, жуықта арнасынан асып-тасып жатқан Аягөз өзенінен өтпек болған үш жігіт суға кеткен деген болжам бар. 23 наурыз күні оқиға орнына Абай облысының ТЖД жедел-құтқару жасағының қызметкерлері дереу жіберілген. Суға кеткен азаматтардың бірі 1977 жылы туған ер адам Аягөз өзенінен өтпекші болған кезде аттан құлаған секілді. Ер адам атпен өзі жұмыс атқаратын «Шығыс» шаруа қожалығына бармақшы болған. Сонымен қатар 26 наурыздан бастап 1957 және 1985 жылы туған тағы екі азаматты іздестіру жүргізіліп жатыр. Олар «МТЗ 82» маркалы тракторда Борлы өзенінен өту кезінде суда жоғалып кеткен. Олар «Шалқар» қосалқы шаруашылығынан Қарағаш ауылына қарай жолға шыққан. Жолда ер адамдар жолды қысқарту үшін өзен арқылы өтпекші болған. Алайда олар өзеннің ортасында тұрып қалған. Оқиға орнына келген құтқарушылар адамдарды таппады.
Іздестіру жұмыстарына Абай облысының ТЖД, полиция департаменті, ЖАО, ӘБ күштері мен құралдары барлығы 41 адам, 4 жүзу құралы, 5 бірлік техника, 3 пилотсыз ұшу аппараттары, сондай-ақ жергілікті тұрғындар есебінен азаматтар жұмылдырылды. Аягөз ауданына адамдарға психологиялық көмек көрсету мақсатында ТЖД психологтері де оқиға орнына жіберілді.
Су айдындарының көктемгі ластануына байланысты сүңгуірлердің көмегімен іздеу жұмыстары өзендердің ағу жылдамдығымен және су астынының көрінуінің нашарлығымен қиындады. 27 наурызда сағат 04.00-ден бастап іздестіру-құтқару жұмыстары қайта жандандырылды, жұмыстар 26 наурызда қараңғы түсуіне байланысты тоқтатылған еді.
Көктемгі тасқын кезінде аса абай болған жөн. Жаздың күні жылап ағатын бұлақтардың өзі бұл уақытта бұлқынып, мінез шығаратынын есте ұстау керек секілді.
Абай облысы