Үкімет басшысы Олжас Бектенов су тасқыны кезінде егіз сәби босанған Қаламқас Қоңырқаеваға көмек көрсеткен Ырғыз ауданы Нұра ауылындағы дәрігерлік амбулатория қызметкерлеріне алғыс білдірді. Олар – Нұра дәрігерлік амбулаториясының жалпы тәжірибелік дәрігері – Сауия Сатаева, мейірбикелер – Айжан Алханова мен Айару Молшылық, деп хабарлайды Egemen.kz.
31 наурыз күні аудан орталығынан 90 шақырым қашықтықта орналасқан Нұра ауылына тасқын судың келіп қалғаны туралы хабарлама түскенде, ауыл жұрты әбігерге түсті. Бұл уақытта Ырғыз бен Нұра арасындағы тасжолды су шайып, қатынас үзілгендіктен, аудандағы акушер-гинеколог дәрігерлердің Нұраға жетуі мүмкін болмады.
Амбулатория қызметкерлері тәжірибелі дәрігер Сауия Сатаеваның басшылығымен ананы аман-есен босандырды.
Іле-шала нұралықтарды эвакуациялауға келген Қорғаныс министрлігіне қарасты Ақтөбедегі Т.Бигелдинов атындағы әскери әуе күштері институтының тікұшағы анасы мен сәбилерді аудандық ауруханаға жеткізді.
Ырғыз аудандық ауруханасының акушер-гинекологі Кәмшат Сәрсенғалиеваның айтуынша, қазір егіздер мен анасының жағдайы жақсы. Нәрестелердің екеуі де қыз бала, біреуінің салмағы – 2800 г, екіншісінің салмағы – 3050 г.
Олар аудандық ауруханада тасқын судың беті қайтқанша ем алады. Көпбалалы ана Қаламқас Қоңырқаеваның бұл бесінші, алтыншы сәбилері.