Таяуда халықаралық сарапшылар еліміздегі банк секторының сенімділігі мен тұрақтылығына тағы бір талдау жүргізді. «S&P Global Ratings» агенттігі активтер сапасы мен реттеушілік қадағалаудың жақсаруына байланысты біздегі 5 екінші деңгейлі банкке (ЕДБ) «барлау» жасаған.
Олар кейінгі жылдардағы макроэкономикалық тәуекел, активтер сапасы мен банк секторы қаржылық көрсеткіштерінің болжанған деңгейден едәуір жоғары екенін әрі қаржылық қадағалаудың біртіндеп ұлғайғанын атап өтеді. Қаңтар айының қорытындысына сәйкес ЕДБ несие портфелі 29,4 трлн теңгені, ал 90 күннен аса мерзімге кешіктірілген қарыздар (NPL90+) 888 млрд теңгені немесе портфельдің тек 3%-ын құраған.
Салыстырмалы түрде қарағанда, бір жыл бұрын банк қарыздарының жиынтық көлеміндегі NPL90+ үлесі – 3,4%, бес жыл бұрын – 8,1%, он жыл бұрын 32,2% болған. Яғни он жыл ішінде несие портфеліндегі NPL 90+ он еседен аса қысқарған.
Микроқаржы ұйымдары секторында былтырғы жылдың қорытындысы бойынша «ұзақ» кешіктірудің үлесі 6,2%-ды құраған. NPL 90+ сомасының өзі тоқсан ішінде 18,2%-ға, 74,3 млрд теңгеге дейін өсіп, микроқаржы ұйымдарының жалпынесиелік портфелі 7%-ға, 1,2 трлн теңгеге дейін ұлғайған.