Билли Джин Кинг кубогінің іріктеу сайысында еліміздің теннисшілері сәтсіз өнер көрсетті. Олар Токиода Жапония құрамасынан 1:3 есебімен ойсырай ұтылды. Алғашқы күні Нао Хибино Анна Данилинаны бас көтертпей жеңсе, Юлия Путинцева Наоми Осакаға есе жіберді. Келесі күні Путинцева атақты Осаканың осал тұсын таба алмады. Одан кейін Анна Данилина мен Жібек Кұламбаева жұбы Сюко Аояма мен Эна Сибахараға сан соқтырды.
Шайбалы хоккейден Андоррада өткен екінші дивизиондағы командалар арасындағы әлем чемпионатының соңғы кездесуінде еліміздің әйелдер құрамасы Испанияның бұрымдыларынан 5:3 есебімен басым түсті. Осы жеңіс арқылы жерлестеріміз бірінші орын иеленіп, келесі жылы бірінші дивизионда күш сынасу мүмкіндігіне ие болды. Бұған дейін Александр Тебеньковтың шәкірттері Мексика (4:2), Тайпэй (3:0), Исландия (7:2), Бельгияны (9:2) жолынан ығыстырған еді.
Отандық Octagon промоушені 19 сәуірде Алматыда аралас жекпе-жектен Қазақстан мен Қытай спортшылары арасында жолдастық кездесу өткізуді жоспарлап отыр. Бұл бәсекелерде мына файтерлер күш сынасады: Сүндет Айтқұл (7-1) – Кингхе Жанг (12-6), Дамир Төленов (11-1) – Бухуогбу (5-3), Ерасыл Шұқатаев (10-4) – Конгву (7-1) және Олжас Нұрқасым (2-2) – Батырали (4-3-1). Сондай-ақ осы жарыста көрермендер назарына тағы бірқатар қызықты айқас ұсынылады.